Qoıandyǵa gaz keldi: 20 myń turǵyn kógildir otynǵa qol jetkizdi
ASTANA. KAZINFORM — Aqmola oblysynyń Qoıandy aýylynda Prezıdenttiń Astana aglomeratsııasyn damytý jónindegi tapsyrmasy aıasynda tabıǵı gaz berý jumystary bastaldy, dep habarlaıdy Energetıka mınıstrligi.
Joba QazaqGaz ulttyq kompanııasy men onyń enshiles kásiporny «QazaqGaz Aimaq» AQ, Aqmola oblysy ákimdigi jáne QR Energetıka mınıstrligimen birlesip júzege asyryldy.
Jalpy uzyndyǵy 226 km-den astam gaz qubyrlary arqyly saǵatyna shamamen 30 myń m³ gaz jetkiziledi, al jańa gaz rettegishteri bes myń úıdi turaqty gazben qamtamasyz etýge múmkindik beredi.
«QazaqGaz Aimaq» Astana fılıaly táýlik boıy jumys isteıtin avarııalyq-dıspetcherlik qyzmeti turǵyndardy gazdy qaýipsiz paıdalaný jóninde habardar etedi. Qoıandyǵa gaz kelýi halyqtyń ómir súrý sapasyn jaqsartyp, kásipkerliktiń damýyna yqpal etedi jáne ekologııaǵa oń áserin tıgizedi.
Jyl basynan beri sondaı-aq Nurly, Shubar, Aqqaıyń, Talapker, Ybyraı Altynsarın aýyldary jáne Qosshy qalasy gazdandyryldy.
Bıyl el boıynsha jalpy 94 eldi meken gazdandyrylmaq, onda 300 myń adam turady. Osylaısha, jyldyń sońyna deıin Qazaqstandaǵy gazdandyrý deńgeıi 63,8%-ǵa jetedi.
Buǵan deıin elordany tolyq gazdandyrý qashan aıaqtalatyny belgili boldy.