Qoıandyda áli kúnge deıin 2 myńǵa jýyq úıdiń qujaty joq — prokýratýra

ASTANA. KAZINFORM — Astana mańynda ornalasqan Qoıandy aýylynyń turǵyndaryn alańdatqan máseleni Aqmola oblysynyń prokýrorlary qolǵa aldy.

Buǵan deıin Qoıandy aýylynyń turǵyndary múlikke quqyq resimdeýge baılanysty qujattardy alý úshin Astana, Kókshetaý qalalaryna barýǵa májbúr bolatyn. 

Bul halyqqa qyzmet kórsetý ortalyqtarynyń qashyqtyǵyna baılanysty azamattardyń narazylyǵyn týdyrdy.

Keıbir jaǵdaıda bul jyljymaıtyn múlik quqyǵynyń uzaq ýaqyt tirkelmeýine sebep boldy.

Sonyń saldarynan sońǵy sý tasqyny kezinde apattan kelgen zalal úshin ótemaqy alý kezinde qujattyń joqtyǵynan problema týdy. 

Mysaly, 2000-ǵa jýyq úıde áli kúnge deıin qujat joq.

Osyǵan baılanysty Bas prokýror Berik Asylovtyń nusqaýy boıynsha Aqmola oblysynyń prokýratýrasy vedomstvoaralyq jumys tobyn qurdy.

Halyqpen birneshe ret kezdeskennen keıin jumys toby memlekettik qyzmetter aýyldyń ózinde kórsetilýi kerek ekenin birinshi kezektegi mindet etip belgiledi.

Ol úshin oblys prokýratýrasy oblys ákimdigimen birlesip Qoıandy aýylynyń № 2 jalpy orta mektebine «bir tereze» qaǵıdaty boıynsha memlekettik qyzmet kórsetý úshin, onyń ishinde azamattardyń jyljymaıtyn múlikke quqyǵyn jedel tirkeý úshin «Azamattarǵa arnalǵan úkimet» KEAQ qyzmetkerleri ýaqytsha ornalastyryldy.