«Qoıandar» astana avtoparkterine 3 mlrd teńge shyǵyn keltirgen
ASTANA. QazAqparat – Astana avtoparkteri bıletsiz jolaýshylar saldarynan 3 mlrd teńge shyǵynǵa ushyrady, dep habarlaıdy QazAqparat tilshisi.
Bul máseleni qalalyq máslıhat otyrysynda depýtat Vladıslav Sergeev kóterdi.
«Bul somaǵa jeke avtoparkter jyl saıyn birneshe avtobýs satyp alar edi. Osy sebepti, biz bul máseleni ótken jyldan beri kóterip kelemiz. Munda asyǵystyq joq. Sebebi, bizde turaq oryndary boıynsha da, «Qazaqstan» sport kesheni boıynsha da birqatar sátsiz seriktestik jobalary bar. Elektrondy bıletteý máselesinde de jaqsy tájirıbesi bar senimdi seriktesti tańdaý kerek. Men áriptesterimdi osy protseske barynsha qosylýǵa shaqyramyn, óıtkeni shart 7 jylǵa jasalady. Demek, 7 jylda biz barlyq máselelerdi sheshýimiz kerek. Sondyqtan, seriktes bıletsiz júrýdi azaıtý, 2GIS, Yandex jáne t.b. sııaqty búkil elektrondy júıeni sınhrondaý boıynsha mindetteme alýy kerek», - dedi Vladıslav Sergeev.
Sondaı-aq, depýtat ótken jyly elektrondy tablolar satyp alynǵanyn atap ótti. Elektrondy bıletpen aınalysatyn seriktes tablomen de sınhrondy jumys isteýi mańyzdy.
Aıta keteıik, elordada 400 jańa avtobýs satyp alynady jáne 6 avtobýs baǵyty iske qosylady.
