Qoıan jyly Qazaqstanda 345,2 myń sábı dúnıege keldi - AHAJ
ASTANA. 13 qańtar. QazAqparat /Jasulan Joldybaev/ - 2011 jyly Qazaqstan halqy 1,3 paıyzǵa kóbeıdi.
Bul týraly búgin ótken brıfıngte QR Statıstıka agenttiginiń tóraǵasy Álıhan Smaıylov málim etti.
«Aǵymdaǵy derekter boıynsha, 2011 jyldyń 1 jeltoqsanynda elimizdegi halyq sany 16657,7 myń adamdy qurady, sonyń ishinde qalada - 9101,3 myń (54,6 paıyz), aýylda - 7556,4 myń (45,4 paıyz) adam tirkelgen. Jyl basymen salystyrǵanda jalpy el boıynsha halyq sany 215,7 myń adamǵa nemese 1,3 paıyzǵa kóbeıdi», - deıdi ol.
2011 jylǵy qańtar-qarashada respýblıka halqynyń tabıǵı ósimi 211,5 myń adamdy qurady, 2010 jyly bul kórsetkish 205,3 myń adam deńgeıinde bolǵan.
AHAJ organdarynyń málimetterine qaraǵanda, byltyr 345,2 myń sábı dúnıe esigin ashty.
