Qoıan-qoltyq urystan QR QK Joǵarǵy Bas qolbasshysy kýbogynyń jeńimpazdary anyqtaldy

ALMATY. QazAqparat - Almatyda Qazaqstan Respýblıkasy Qarýly Kúshteri Joǵarǵy Bas qolbasshysynyń kýbogy úshin qoıan-qoltyq urystan VI ashyq respýblıkalyq týrnırdiń fınaldyq jekpe-jekteri ótti, dep habarlaıdy QazAqparat.

QR Qorǵanys mınıstrliginiń baspasóz qyzmetinen málim etkendeı, myqtylar synalatyn jarysta jeńiske jetý úshin Qarýly Kúshter, Ulttyq qaýipsizdik komıteti, Memlekettik kúzet qyzmeti, Ulttyq ulan, sondaı-aq elimizdiń túrli óńirlerinen kelgen sportshylar óz salmaq dárejesinde baǵyn synady.

Týrnır jeńimpazdary: 55 keli salmaqta Qorǵanys mınıstrliginiń sportshysy Aman Shákirtov, 60 kelige deıin, 65 kelige deıin, 75 kelige deıin, 85 kelige deıin jáne 90 keliden joǵary sanattarda QR ІІM ókilderi – Ashat Jylysbekov, Yrysbek Baıdýllaev, Aıdyn Tólepbaev, Asylbek Smaıylov, Jeńis Erdáýlet. 70 kelige deıingi dárejede Memlekettik kúzet qyzmetinen Danııar Qoıshybek, 80 kelige deıin – Áýe qorǵanysy kúshteriniń ókili Jomart Jáketaev, 90 kelige deıin – Ulttyq qaýipsizdik komıtetinen Demeı Beksultan.

Týrnır kvalıfıkatsııalyq bolyp tabylady – jeńiske jetken sportshylarǵa «Qazaqstan Respýblıkasynyń sport sheberi» ataǵy beriledi.

Jalpy komandalyq esepte birinshi oryndy Іshki ister mınıstrliginiń quramasy, ekinshi oryndy Memlekettik kúzet qyzmetiniń komandasy, úshinshi oryndy Qorǵanys mınıstrliginiń komandasy ıelendi.