Qoıan-qoltyq urystan álem chempıonatynda Qazaqstan quramasy 21 «altyn» jeńip aldy
ASTANA. QazAqparat - Elordada ótken qoıan-qoltyq urystan álem chempıonatynda Qazaqstan quramasy úzdik nátıje kórsetti, dep habarlaıdy QazAqparat tilshisi.
Atalǵan saıysta el sportshylary 21 altyn, 19 kúmis jáne 21 qola medal jeńip alyp, jalpykomandalyq esepte kósh bastady.
Álem chempıonatynyń altynyn ıelengender arasynda Medet Qojbanov, Erdaýlet Jeńis, Іlııas Muhamadıev, Mádı Raıhan, Dáýlet Temirhanov, Maqsat Bekmuhanbetov, Tımýr Shalov jáne Qaırat Muqanbekovter bar.
Al kúmis júldeni Serik Ábirov, Andreı Tıreshın, Araı Mýsına, Saıa Áýelbekova, Amanbek Jamanqaraev, Álıhan Seıtov, Aıdyn Úmbetov syndy jekpe-jek sheberleri jeńip aldy.
Sonymen qatar, Ámına Sháımenova, Shynar Kenjebaeva, Ásel Jumaqaeva, Shynar Baımýrzına, Alekseı Belıkov, Sergeı Bredıhın men Ardaq Madımuhametovter úshinshi orynnan kórindi.
Jalpykomandalyq esepte 7 altyn, 7 kúmis jáne 15 qola medalmen Reseı Federatsııasyń komandasy ekinshi orynǵa turaqtady. Júlde sany boıynsha Ózbekstan quramasy úzdik úshtikti qorytyndylady. Al el sportshylary 7 altyn, 6 kúmis jáne 12 qola medal jeńip aldy.
Aıta keteıik, atalǵan álem chempıonatyna 32 elden kelgen 300-den sportshy qatysty. Bul sporttyń «Jekpe-jek» túrinde álem birinshiliginiń medaldary úshin 17 salmaq dárejesinde 118 er jáne 43 áıel jekpe-jek sheberi saıysty. «Ózin ózi qorǵaý» boıynsha 16 salmaq dárejesinde 129 er men 32 áıel ózara myqtyny anyqtady.
Qosa ketsek, qoıan-qoltyq urystan álem chempıonaty 16-18 maýsym aralyǵynda Astanadaǵy J.Úshkempirov atyndaǵy jekpe-jek saraıynda ótti.
Keshe saıys barysynda BAQ ókilderi úshin uıymdastyrylǵan baspasóz maslıhaty barysynda Halyqaralyq qoıan-qoltyq urys federatsııasynyń prezıdenti Sergeı Astahov saıysty joǵary deńgeıde uıymdastyrýǵa atsalysqan Búkilqazaqstandyq jekpe-jek saıysy qaýymdastyǵynyń prezıdenti Sáken Isabekovke alǵys bildirgen edi.
