Qoıan-qoltyq urystan Álem chempıonatynda Qazaqstan ekinshi oryn ıelendi
ASTANA. 22 sáýir. QazAqparat - 18-21 sáýir aralyǵynda Máskeý qalasynda ótken qoıan-qoltyq urystan ekinshi Álem chempıonatynda Qazaqstan komandasy 3 altyn, 2 kúmis, 8 qola medel alyp, jalpy esepte 2 orynǵa taban tiredi.
Bul týraly búgin Dınamo sport kesheninde ótken baspasóz máslıhatynda Qazaqstannyń qoıan-qoltyq urys federatsııasynyń prezıdenti, QR Parlamenti Májilisiniń depýtaty Abaı Tasbolatov málimdedi.
Onyń aıtýynsha, qazaqstandyq komanda quramynda 16 sportshy bolǵan. Olardyń 9-y erler, 7-eýi áıelder.
«Quramyna bokstan bastap, dzıýdo, djıý-djıtsý, sambo, kúres jáne basqa da kóptegen sport túrleri enetin qoıan-qoltyq urys elimizde jyldan jylǵa qarqyndy damyp kele jatyr. Oǵan dálel 35 memleket qatysqan osynaý álem chempıonatynda bizdiń qyz-jigitterimizdiń 2-oryn alyp qaıtýy», - dep atap ótti A. Tasbolatov.
Aıta ketý kerek, chempıonatta 1-oryndy Reseı, 3-shi oryndy Belarýs elderi ıelendi. Al qazaqstandyq sportshylardan Berik Shynalıev (55 keli), Birjan Agımov (70 keli) jáne Roza Qalıeva (55 keli) altyn medal alyp qaıtty.
