Qoıan-qoltyq urystan álem chempıony atanǵan atyraýlyq polıtseı

ATYRAÝ. KAZINFORM – Atyraý oblysynyń polıtsııasynda jumys isteıtin qyz-kelinshekter az emes. Sonyń biri – qoıan-qoltyq urystan áıelder arasyndaǵy álem chempıony, polıtsııa aǵa leıtenanty Dıana Jumaǵazıeva. Qazir Atyraý qalasynda kámeletke tolmaǵandar isi jónindegi ýchaskelik polıtsııa ınspektory bolyp jumys isteıdi.

Óziniń aıtýynsha, bala kezinen polıtsııada jumys isteýdi maqsat etken. Sol maqsatpen M.Bókenbaev atyndaǵy zań ınstıtýtyn bitirgen. Quqyq qorǵaý organyndaǵy qyzmetin ýchaskelik polıtsııa ınspektorynyń kómekshisinen bastaǵan. 

«Maǵan bul mamandyq nesimen unaıdy? Óıtkeni, men bireýge kómekteskendi, kishkentaı balalardy, bireýden zábir kórgen jandardy qorǵaýdy unatatyn edim. Bala kezimnen ádiletti bolýǵa, ár isti jaýapkershilikpen atqarýǵa úırengenmin. Bul ásirese, polıtsııa qyzmetkerlerine tán bolýy kerek. Qazirgi qyzmetim jasóspirimder arasyndaǵy qylmystyń aldyn alýmen, ashýmen baılanysty bolǵandyqtan, osy qaǵıdalardy ustanamyn», - deıdi Dıana Jumaǵazıeva. 

Onyń pikirinshe, jasóspirimderdiń bári birdeı emes. Otbasyndaǵy tárbıege, aralasatyn ortasyna baılanysty olardyń minezinde ózgerister bolýy múmkin. 

«Jaman adam bolmaıdy ǵoı. Ásirese, jasóspirimderdiń arasynda túrli teris áreket jasaýǵa beıim turatyny kezdesedi. Olardyń mundaı áreketke barý sebebin zertteý kerek. Bálkim, keıbiri balalyq áýestikpen, al, ózgesi ata-anasyna, dostaryna renjigennen osyndaı teris qadam jasaýy múmkin. Sol sebepten, jasóspirimdermen ashyq sóılesemin. Eshteńeni jasyrmaýdy suraımyn. Ras, keıde bireýimen jyly, ózgesimen azdap qatqyl sóılesýge týra keledi. Óıtkeni, bizdiń maqsatymyz – quqyq buzǵan jasóspirimdi jazalaý emes, olardy teris jolǵa túsýden saqtandyrý, qylmysker atanýdan qorǵaý. Eń bastysy, jasóspirimderdi qoǵamǵa paıdaly bolýǵa tárbıeleý», - deıdi polıtsııa aǵa leıtenanty. 

Dıana Jumaǵazıeva jumyspen ǵana shektelmeı, sporttyń kıkboksıng jáne qoıan-qoltyq urys túrimen shuǵyldanady. Ol – jastar arasyndaǵy Qazaqstannyń chempıony, qoıan-qoltyq urystan áıelder arasyndaǵy álem chempıony. 

«Bala kezimde anam meni sýret salý, bı sekildi túrli úıirmege apardy. Biraq, kóńilim mundaı úıirmelerdi qalamady. Jeti jasymda taekvondomen aınalysýǵa bel býdym. Úsh jyldan keıin kıkboksıngke aýystym. Al, joǵary oqý ornynda oqyǵanda qoıan-qoltyq urysty meńgerýdi kózdedim. Fızıkalyq turǵydan myqty bolý úshin sporttyń jekpe-jek túrlerin tańdadym», - deıdi Dıana Jumaǵazıeva. 

Eske sala ketelik, budan buryn búgin atyraýlyq qyz-kelinshekter qoǵamdyq kólikpen tegin qatynap júrgenin jazǵan edik.