«Qoı jyly qorjynymyz toly» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 16 jeltoqsan, sársenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

«Egemen Qazaqstan» gazetiniń búgingi sany Táýelsizdik kúni merekesine arnalyp otyr.

«Qym­batty qazaqstandyqtar, qurmet­ti saltanatty jıynǵa qatysý­shy­lar! Barshańyzdy Uly Dala eliniń ulyq merekesi - Táýelsizdik kúnimen shyn júrekten quttyqtaımyn! Biz búgin azattyqtyń ekinshi músheline, 25 jyldyǵyna aıaq bastyq, dedi Elbasymyz Nursultan Nazarbaev Qazaqstan Res­pýb­lıkasynyń Táýelsizdik kúnine arnalǵan saltanatty jıynda.

Árbir eldiń jylnamasynda onyń jańa tarıhynyń bastaýy bolǵan taǵdyrsheshti tańdar bolady. Biz úshin jańa dáýirdiń araı tańy 1991 jyly 16 jeltoqsanda atty. Sol kúni álem kóginde Qazaqstan Respýblıkasy atty jańa juldyz jarqyrap turdy. Tutas dáýirlerdiń kýási bolǵan halqymyz san ǵasyrlar buralań ári qıyn jolmen júrip ótti.

«Adam balasy sııaqty memleket te ómirinde eki ǵumyrlyq bosaǵadan attaıdy. Birinshisi - jaryq dúnıeniń esigin ashý. Ekinshisi - ere­sek ómirdiń tabaldyryǵyn basý. Ekeýi de qaıtalanbas qasterli mezet­ter». Bul - Ábý Nasyr ál-Fara­bıdiń oramdy aıtyp ketken sózi, ónegeli ósıeti. Bıyl, mine, osynaý rýhy asqaq, tuǵyry bıik tól mem­leketimizge 24 jyl toldy. Qara­paıym tilmen aıtqanda, naǵyz erdiń jasynda, uly maqsattardyń basyn­da turmyz, dedi Qazaqstan Prezı­denti. Táýelsizdik merekesine arnalǵan bul maqala «Ult órleýiniń dańqty dáýiri» degen taqyryppen kópshilik nazaryna usynylyp otyr.

Bas basylymda «Túrkııada top jardy» atty maqala berilgen. Qazaq urpaǵynyń talantty ekenin Túrkııa jurtynda taǵy bir qy­zymyz dáleldep shyqty. Ota­nymyzda qazir qyzý júrip jatqan «Qazaqstan daýysy» atalatyn jas ánshiler baıqaýyndaı óner jarysy Túrkııa memleketinde de biraz jyldan beri jalǵasyp kele jatqany belgili. Ol da «Túrkııa daýysy» dep atalady. Bıylǵy jylǵy baıqaýǵa Ystam­­bul qalasyndaǵy OKAN ýnıver­sıteti halyqaralyq qaty­nastar fakýltetiniń sońǵy kýr­synda oqyp júrgen Alma Bolat­qyzy Qojan baq synap kórgen eken. Alma óz atamekeninde de osyndaı óner báıgesinde júlde alyp júredi eken. Máselen, 6-shy synyp oqýshysy kezinde jas­ós­pirimder arasyndaǵy án baı­qaýynda laýreat atanǵanyn aıta ketsek deımiz. Bul onyń ónerge degen umtylysyn, boıynda bar talantyn tanytary anyq. Barlyq túrki elderinen qatysqan baıqaýda Alma Bolatqyzy sol elge tanymal ánshi Hadıse Achykgezdiń «Ben Boyleyim» («Men osyndaımyn») degen ánin aıtqanda, qazylar alqa­sy talantty qyzdyń ashyq daýysyna, ádemi ıirimderine iltıpat tanytyp, bir aýyzdan kelesi týrǵa joldama beripti. Ol endigi jerde «Hadısenyn» tobynda jarys­ty jalǵastyrady. Tyńdarmandar men qazylar alqasy Almanyń ónerine súısinip, taza qazaq tilinde de bir án salýyn ótinipti. Ol dalamyzdaı darqan áýendi kókke áýeletkende qaýmalaǵan jurt qol soǵyp, qurmet kórsetipti. «Bul tabysymdy Otanymnyń Táýelsizdigine tartýym!» degen Almanyń bul jeńisi qazir áleýmettik jelilerden oryn alyp, elimizdiń teledıdarlary jarysa súıinshi surap jatyr.

***

«Qoı jyly Qazaqstan sporty úshin tolaǵaı tabystarǵa toly boldy. Shet memleketterde ótken talaı dúbirli dodada qasıetti kók týymyz talaı ret bıikte jelbirep, ánuranymyz san márte shyrqaldy. Sonymen qatar óz elimizde birqatar iri sporttyq sharalar ótkizildi. Olardyń barly­ǵynyń da uıymdas­tyrylý deńgeıi asa joǵary bolǵanyn Alash topyra­ǵy­na taban tiregen laýazymdy tulǵa­lar men qurmetti meımandardan bastap, qatardaǵy qarapaıym jankúıerlerge deıin erekshe atap ótti»,-dep jazady «Aıqyn» gazeti.

Osy kúnge deıin Olımpıada baǵdarla­masyna engen sport túrleri boıynsha álem chempıonattary Qazaqstanda nebári eki ret qana ótken bolatyn. Olar - 2013 jyly bokstan jáne 2014 jyly aýyr atletıkadan Almatyda uıymdastyrylǵan dúbirli doda­lar. Bıyl tórtkúl dúnıeniń teńdessiz tata­mı sheberleri Astanada bas qosty. 123 mem­le­kettiń ókilderi Alash topyraǵynda aıqa­syp, 2016 jyly Rıo-de-Janeıroda alaýy tutanatyn Olımpıada oıyndarynyń jol­damalaryn sarapqa saldy. «Jan alysyp, jan berisken» básekeler barysynda olar nebári jeti eldiń órenderine ǵana buıyrdy. So­lar­dyń arasynda Qazaqstan da bar. Elimizdiń sporttaǵy jetistikteri týraly jazylǵan bul kólemdi maqala « Qoı jyly qorjynymyz toly» degen taqyryppen jarııalandy.

Osy basylymda « Alǵashqy qonys aýdarýshylar páterdiń kiltine ıe boldy» atty maqala basyldy. Batys Qazaqstan oblysyndaǵy Bórli aýdanyna qarasty Berezovka aýyly turǵyndary ishinen alǵashqy bir otbasy Aqsaı qalasyndaǵy jańa páterlerdiń kiltin aldy, dep jarııalady «Qarashyǵanaq Petroleým Opereıtıng B.V.» (KPO) kompanııasy. Qarashyǵanaq ken ornynyń mańyndaǵy sanıtarlyq-qorǵaý aýmaǵynyń keńeıtilýine baılanysty osy aýmaqta ornalasqan Bere­zovka men Bestaý eldi mekenderin kóshirý Batys Qazaqstan oblysynyń jergilikti at­qarý organdarymen júzege asyrylyp jatyr. Qarashyǵanaq munaı-gaz kondensat ken or­nynyń merdigerlik ýchaskesine qatysty 1997 jyldyń 18 qarashasyndaǵy ónimdi bólý týra­ly túpkilikti kelisimge sáıkes, qonys aýda­rý­ǵa qatysty sharaǵa qajetti qarjy-qarajatty KPO konsortsıýmy moınyna alǵan.

Eki aýyl turǵyndarynyń jańa qonysqa kóshýi eki kezeńge bólingen. Birinshi kezekte jaıly páterlerge 2015 jyldyń aıaǵyna deıin, birinshi kezeńde kóshýge nıet bildirgen álsiz áleýmettik sanattaǵy adamdar men otba­sylar kóshirildi. Búgingi kúni eki aýyldan kóshe­tinder 82 otbasy, olar Aqsaı qalasyn­daǵy jańadan salynǵan úılerdegi jaıly páterlerge qonystanady. Birinshi kezeńde kóshiriletin kandıdattardy iriktegende soǵys ardagerlerine, jalǵyzbasty zeınetkerlerge, múmkindikteri shekteýli adamdarǵa, múgedek balalary bar otbasyna, sondaı-aq Qazaqstan Respýblıkasynyń úkimetimen bekitilgen tizimge kiretin sozylmaly aýrýǵa shaldyqqan músheleri bar otbasylaryna basymdyq berildi.