Qoı júniniń 70% qoqysqa ketip jatyr – Depýtat

ASTANA. KAZINFORM – Májilis depýtaty Qaraqat Ábden mal sharýashylyǵynyń qosalqy ónimderin óńdeý máselesin kóterdi jáne óńirlerde mal júni men terisin qaıta óńdeý jóninde Keshendi ulttyq jospar qurýdy usyndy.

— Qarapaıym statıstıkanyń ózi-aq máseleni aıqyndaıdy: 2025 jyldyń basynda Qazaqstanda 9,6 mln iri qara, 20 mln-nan astam qoı-eshki bolǵan. Demek, jylyna júzdegen myń tonna jún, teri, ishek-qaryn óndiriledi. Alaıda qoı júniniń 70 paıyzǵa deıingisi jáne teriniń 50 paıyzǵa jýyǵy suranyssyz qalyp, sharýashylyqtarda órtelip nemese shirip ketedi. Bul tabys kózinen aıyrylý ǵana emes, ulttyq ekonomıka úshin jiberilgen úlken múmkindik, — dedi depýtat Májilistiń búgingi otyrysynda.

Halyqaralyq tájirıbe (Iran, Túrkııa, Ózbekstan, Mońǵolııa) kórsetkendeı, mal sharýashylyǵynyń qosalqy ónimderin óńdeý — tabysy zor sala. Ol shıkizatty jınaýdan bastap mata, kilem, kıim, jıhaz jáne farmatsevtıka ónimderin óndirýge deıin tolyq tsıkldy qamtıdy.

— Qazaqstanda budan da mol múmkindik bar. Al biz áli kúnge deıin shıkizatty ysyrap qylyp, múmkindikti qolymyzdan shyǵaryp kelemiz. Elge jeke kásiporyndar ǵana emes, barlyq negizgi óńirlerdi qamtıtyn óńdeý kásiporyndarynyń tolyqqandy jelisi qajet. Osyǵan oraı, «Aýyl» partııasy 2030 jylǵa deıin arnalǵan jún men terini qaıta óńdeý jónindegi Keshendi ulttyq jospardy bekitýdi usynady. Barlyq ákimderge óńdeý kásiporyndaryn ashýdy mindettep, naqty KPI engizý kerek. Investorlarǵa salyq jeńildigin berip, jeńildetilgen nesıe, jer jáne ruqsat berý rásimderin jedeldetý qajet, — dedi Q. Ábden.

Aıta keteıik, QR Premer-mınıstri Oljas Bektenov QR Aýyl sharýashylyǵy mınıstrligine 2 aı ishinde mal sharýashylyǵyn damytýdyń keshendi josparyn ázirleýdi, 1 aı ishinde jer resýrstaryn ádil bólýge baǵyttalǵan tıisti zańnamalyq bastamalardy ázirlep, usynýdy tapsyrdy.