Qoı júninen tyńaıtqysh óndirý — eginshilikke ekologııalyq serpin
ASTANA. KAZINFORM — Jambyl oblysynda qoı júnine negizdelgen organıkalyq tyńaıtqysh eksperımenttik úlgide óndirilip jatyr. Bul jaıynda Aýyl sharýashylyǵy mınıstrliginen málim etti.
- Búgingi tańda qoı júnin organıkalyq tyńaıtqysh retinde paıdalaný Germanııa, Ulybrıtanııa, Mońǵolııa sııaqty elderde damyp keledi. AQSh-ta júndi organıkalyq eginshilikte qoldaný boıynsha ǵylymı zertteýler júrgizilip jatyr. Qazaqstanda shıkizat bazasynyń bolýy men damyǵan qoı sharýashylyǵyn eskere otyryp, ásirese sýarmaly eginshilik jáne topyraqtaǵy organıkalyq zattardyń tapshylyǵy jaǵdaıynda qoı júnin organıkalyq tyńaıtqyshtar retinde qoldaný zor múmkindikke ıe. Búginde qoı júnine negizdelgen organıkalyq tyńaıtqyshtardyń az mólsheri Jambyl oblysynda eksperımenttik túrde óndiriledi, - dedi vedomstvodan agenttik saýalyna oraı.
Aıta keterligi, memlekettik tapsyrys boıynsha baǵdarlamalyq-nysanaly qarjylandyrý aıasynda mınıstrlik jyl saıyn ǵylymı zertteýler júrgizýge jáne óndiriske, agroónerkásiptik keshen salasynda jańa ozyq tehnologııalardy engizýge baǵyttalǵan bıýdjettik baǵdarlamany iske asyryp jatyr.
- Mundaı ǵylymı jumystardyń basym baǵyttarynyń qatarynda ártúrli aýyl sharýashylyǵy daqyldary úshin qoı júninen organıkalyq tyńaıtqyshtardy tıimdi paıdalanýdy zertteý josparlanǵan. Sonymen qatar 2028 jyldan bastap ónerkásiptik óndiristiń organıkalyq tyńaıtqyshtaryn satyp alý kezinde memlekettik qoldaý tetigin engizý kózdelip otyrǵanyn atap ótken jón. Bul óz kezeginde ekologııalyq taza tyńaıtqyshtar óndirisin, onyń ishinde qoı júnin óndirýdi damytýǵa túrtki bolady, - dedi Aýyl sharýashylyǵy mınıstrliginen.
Esterińizge sala ketsek, ótken jyldyń qarashasynda aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev eldegi tyńaıtqysh óndirisine toqtalǵan edi. Prezıdent organıkalyq tyńaıtqysh óndirisin damytý mańyzdy ekenin aıtty. Halyqaralyq tájirıbe boıynsha qoıdyń júnin sýarmaly jerge tyńaıtqysh retinde tıimdi paıdalanýǵa bolatynyna nazar aýdardy.