Qoı álde sıyr eti: qaısysy tıimdi jáne paıdaly
ASTANA. KAZINFORM — Qazaqstannyń qaı óńirinde et baǵasy tómen? As ázirlegende sıyr etin qosqan durys pa, álde qoı etin be? Et baǵasynda myń teńge aıyrmashylyq bar. Al quramy men paıdasyna keler bolsaq, árqaısysynyń óz artyqshylyǵyn eskergen jón.
Elimiz boıynsha qoı etine qaraǵanda sıyr etiniń baǵasy tómen. Eń arzanyn salystyrǵan kezde sıyr eti qoljetimdi bolyp shyqty. Tómen baǵa Qyzylorda qalasynda tirkeldi. Munda kelisi shamamen 3 200 teńge. Al Oral qalasynda 3 300–4 000 teńge, Qostanaıda 3 400–3 700, Taldyqorǵanda 3 400–4 500 teńge.
Sıyr etiniń baǵasy Almaty, Shymkent pen Atyraý qalasynda joǵary. Kelisi 5 500 teńgege jetti. Taraz qalasynda ettiń kelisi 5 000 — 5 400, Óskemende 4 500 — 5 000 teńge bolyp tur.
Qoı etiniń baǵasy ózge. Atyraý qalasynda kelisi orta eseppen 3 500 teńge. Taldyqorǵanda 3 800–4 200 teńge, Qostanaıda 3 900–4 100, Oralda shamamen 4 000 teńge. Al Taraz qalasynda kelisi 5 600 teńgege, Almaty men Pavlodarda 5 400 teńgege jetken.
Qazirgi kezde elimizde sıyr etin satyp alý tıimdi bolyp tur. Onda da baǵa óńirlerge qaraı ózgerip otyrady. Baǵaǵa maldy qaıda baqqany, tasymal men saýda orny áser etedi. Sonymen birge som et pen jilikke qaraı da quny qubylyp turady.
Al endi ettiń paıdaly tusyna keler bolsaq… Bul suraqqa birjaqty jaýap berýge bolmaıdy. Sıyr eti aqýyz, temir, myrysh jáne B12 dárýmenine baı. Maısyz etti kúndelikti tamaqqa qosýǵa bolady jáne bul maı mólsherin baqylaýǵa múmkindik beredi.
Qoı etiniń quramynda aqýyz, temir, myrysh jáne B tobynyń dárýmenderi bar. Degenmen qoı etiniń keıbir bóligi maıly jáne kalorııasy joǵary. Sondyqtan et satyp alǵan kezde maısyz jerin tańdap alǵan durys.
Adam etti qajetine qaraı satyp alady. Eger qaltaǵa salmaq salǵysy kelmese kóbine sıyr etin tutynǵan durys. Qoı etin tańdaǵandar aǵzaǵa sińimdi ári paıdalasyn qup kóredi. Adam densaýlyǵy úshin ettiń túri emes, onyń maılylyǵy, sapasy, taǵamdy daıyndaý ádisi mańyzdy. Ári qanshalyqty toıyp jegenińiz de densaýlyqqa áser etedi.
Qazaqstan boıynsha qalalarda et baǵasy ártúrli. Sıyr etiniń kelisi 3 200 teńgeden bastalyp, 5 500 teńgege, al qoı etiniń baǵasy 3 500 teńgeden bastalyp, 5 600 teńgege jetti, ıaǵnı ekeýiniń birin tańdaǵan kezde neniń eti ekeni ǵana emes, qaı óńirden satyp alǵanyńyz da mańyzdy.
Buǵan deıin habarlaǵanymyzdaı, Úkimet otyrysynda Saýda jáne ıntegratsııa mınıstri Arman Shaqqalıev eki jylda et eksporty óskenin aıtty.
