Kovıd indeti: qazaqstandyqtar jappaı maska taǵa ma
ASTANA. KAZINFORM – Parıj Olımpıadasynan oralǵan birqatar qazaqstandyq sportshydan kovıd indeti anyqtalyp, Memleket basshysymen kezdesý keıinge shegerilgeni belgili. Osy rette, qoǵamda «indet órship jatyr, barlyǵy jappaı maska taǵýy tıis» degen mándegi túrli alyp-qashpa áńgimeler aıtyla bastady. Bul máselege QR Densaýlyq saqtaý birinshi vıtse-mınıstri Tımýr Sultanǵazıev túsinikteme berdi.
«Elimizde koronovırýs ınfektsııasyna baılanysty jaǵdaı turaqty. Medıtsınalyq nysandardyń qyzmetkerleri ǵana maska taǵýǵa mindettelgen. Emdelýshilerdiń maska taǵý ıakı taqpaýy óz erkinde», - dedi ol.
Aıta keteıik, QR memlekettik bas dárigeriniń m.a. 2024 jylǵy 16 tamyzdaǵy №7 «2024-2025 jylǵy epıdemııalyq maýsymda tumaý, ótkir respıratorly vırýsty ınfektsııa (JRVI) jáne koronavırýs ınfektsııasy (COVID-19) boıynsha sanıtarlyq-profılaktıkalyq, sanıtarlyq-epıdemııaǵa qarsy is-sharalar ótkizý týraly» qaýlyǵa qol qoıdy.
Qaýlyda JRVI, tumaý jáne COVID-19 boıynsha epıdemııalyq maýsym merzimine profılaktıkalyq jáne epıdemııaǵa qarsy is-sharalar, sonyń ishinde:
– 2024 jyldyń 1 qyrkúıeginen bastap tumaýǵa qarsy vaktsınatsııa júrgizý;
– Medıtsınalyq uıymdarda: kireberisti «súzgi» jumysymen qamtamasyz etý, betperde taǵý, antıseptıkterdiń bolýy;
– JRVI, tumaý baıqalǵan bir jasqa deıingi sábıler men júkti áıelderdiń úıge shaqyrtýyna birinshi kezekte qyzmet kórsetý qarastyrylǵan.
