KOVID: Almatyda 7 myńnan astam tósek-oryn daıyndaldy
ALMATY. QazAqparat – Almaty ákimi Baqytjan Saǵyntaev QR Prezıdenti janyndaǵy Ortalyq kommýnıkatsııalar qyzmetinde ótken brıfıngide pandemııanyń jańa tolqyny men megapolıstiń sanıtarlyq-epıdemıologııalyq qaýipsizdigin qamtamasyz etýge qatysty sharalar týraly aıtty, dep habarlaıdy QazAqparat tilishsi.
Almatyda 7011 tósek-oryny bar 23 statsıonar daıyndaldy. Pandemııa kezinde Almatyda úsh jańa ınfektsııalyq statsıonar salyndy — 2 modýldi klınıka jáne RV-90 gospıtali. Jeke ınvestıtsııalar esebinen eki klınıka qaıta quryldy.
«Klınıkalardyń materıaldyq-tehnıkalyq bazasyn nyǵaıtý boıynsha jumys júrgizilip jatyr. Ótken jyly mekemelerdi medıtsınalyq jabdyqtarmen jaraqtandyrýdy jańǵyrtýdyń úsh jyldyq baǵdarlamasy qabyldandy. Bıyl 74 statsıonar men klınıka úshin 4197 birlik qural-jabdyq satyp alyndy», — dedi Almaty ákimi B. Saǵyntaev.
Onyń keltirgen málimetteri boıynsha, jedel medıtsınalyq kómek kórsetý jumysy jáne naýqastardy baǵdarlaý jańa algorıtmge aýystyryldy. Jańa 35 jedel járdem kóligi satyp alyndy. 16 jeltoqsanǵa deıin qosymsha 50 mashına keledi. 2021 jyldyń basynda taǵy 50 kólik alynbaq.
Jalpyqalalyq zerthanalyq jeli men patsıentterdi dıagnostıkalaý jumysy ortalyqtandyryldy. Jalpy, qýattylyǵy táýligine 14 myńnan astam PTR-zertteýlerin 22 myńǵa deıin keńeıtý múmkindigi bar.
Qalalyq statsıonarlar úshin tikeleı qoljetimdi KT-, MRT-, rentgen-sýretterdiń biryńǵaı banki quryldy. Jasandy ıntellektige negizdelgen AT platformasy ókpeniń eń kóp zardap shekken aımaǵyn anyqtaıdy. Ol dárigerlerge naqty dıagnoz qoıýǵa jáne em-domnyń sapasyn jaqsartýǵa kómektesedi.
Sonymen birge, ambýlatorlyq deńgeıde medıtsınalyq kómek kórsetýdiń mańyzdy býyny (túıini) bolyp tabylatyn alǵashqy medıtsınalyq-sanıtarlyq kómektiń jumysy kúsheıtildi.
«Ótken jyly biz jaqyn ornalasqan qoljetimdi jerden medıtsınalyq qyzmet túrlerimen qamtamasyz etý boıynsha úsh jyldyq qalalyq jospardy qabyldadyq. Barlyǵy 35 ambýlatorııa salynady. 16 ambýlatorııa iske qosyldy, kelesi jyly taǵy 11 ambýlatorııa paıdalanýǵa beriledi», — dep atap ótti megapolıs ákimi B. Saǵyntaev.
Birinshi eshelon statsıonarlaryn medıtsınalyq gazben, sonyń ishinde otteginiń ortalyqtandyrylǵan júıesimen qamtamasyz etý jónindegi jalpyqalalyq baǵdarlama iske asyrylýda. Qalanyń medıtsınalyq uıymdarynyń káriz sýlarynyń bıologııalyq qaýipsizdigi rejımi engizildi. Medıtsınalyq qaldyqtardy kádege jaratýǵa baqylaý kúsheıtildi.
