Koýchıng qyzmetiniń kásibı standarty: 14 aqpannan bastap ne ózgerdi
ASTANA. KAZINFORM — Qazaqstanda koýchıng qyzmetin zań aıasynda retteý jáne tutynýshylardyń quqyǵyn qorǵaý maqsatynda jańa kásibı standart kúshine endi. Osy jyldyń 14 aqpanynan bastap bul saladaǵy mamandardyń qyzmeti qalaı retteletinin zańger Saǵı Oraz taldap berdi.
Saǵı Orazdyń aıtýynsha, bul qadam halyqty aldap, paıda taýyp júrgen «jalǵan koýchtardyń» jolyn kesý úshin jasalyp otyr.
— Qazirgi tańda halyqty aldap, sonyń arqasynda paıda taýyp jatqandar óte kóp. Jańa standarttardyń basty maqsaty — tutynýshynyń quqyǵyn zań aıasynda qorǵaý. Endi ózin jalǵan koých retinde tanystyryp, adamdardy jańylystyrǵandar ákimshilik, azamattyq, tipti qylmystyq jaýapkershilikke tartylýy múmkin. Zańnyń keri kúshi joq, biraq 14 aqpannan bastap júrgizilgen kez kelgen qyzmet qatań baqylaýda bolady, — deıdi zańger Jibek Joly telearnasynyń Bugin LIVE baǵdarlamasynda.
Mamannyń aıtýynsha, tutynýshy men koých arasyndaǵy qarym-qatynas tek kelisimshart negizinde júrýi shart.
— Kelisimshartta mamannyń koých ekenin rastaıtyn sertıfıkattary men jetistikteri kórsetilýi tıis. Bul birinshiden mamannyń óz quqyǵyn, ekinshiden tutynýshyny qorǵaıdy. Eger qyzmet sapasyz bolsa nemese jábirlenýshige zalal kelse, bul fakt Qylmystyq kodekstiń 190-baby alaıaqtyq boıynsha qarastyrylýy múmkin. Tutynýshylarǵa aldymen mamannyń qujattaryn tekserip, halyqaralyq reestrde bar-joǵyna kóz jetkizýge keńes beremin, — dep tolyqtyrdy Saǵı Oraz.
Zańgerdiń aıtýynsha bolashaqta bul sala tek sertıfıkattalǵan mamandar jumys isteıtin ortaǵa aınalmaq. Al eger qoǵam úshin qaýip deńgeıi joǵarylasa, aldaǵy ýaqytta koýchıng qyzmetine arnaıy lıtsenzııalaý júıesi de engizilýi múmkin.
Úkimet basshysy Oljas Bektenovtiń málimetinshe, «Koýchıng qyzmeti» kásibı standarty ICF (International Coach Federation) halyqaralyq federatsııasymen birlesip ázirlengen. Bul standart 9 negizgi baǵytty (bıznes-koých, laıf-koých, sporttyq koých jáne t. b.) qamtıdy. Endi kez kelgen maman career.enbek.kz platformasyndaǵy arnaıy tizilimge enýi tıis.
Eske sala keteıik, byltyr Qazaqstan azamattarynan koých qyzmetine 900-ge jýyq shaǵym túsken bolatyn.