Kottedj saldyryp, qurylysshylarǵa aqshasyn bermegen Aqtaý sotynyń tóraǵasy qyzmetinen shettetildi
AQTAÝ. QazAqparat - Ózine kottedj saldyryp, qurylysshylardyń aqshasyn bermeı qoıǵan Aqtaý qalalyq sotynyń tóraǵasy Málik Kenjalıev laýazymynan shettetildi. Bul týraly Mańǵystaý oblystyq sotynyń baspasóz qyzmetinen málim etti, dep habarlaıdy QazAqparat.
2018 jyldyń maýsym aıynda Ózbekstan azamaty Maqsut Qalandarov QR Joǵarǵy sotynyń Іshki qaýipsizdik bólimine telefon shalyp, 2013-2014 jyldary kottedj salǵyzǵan Málik Kenjalıev qurylysshylardyń eńbek aqysyn tóleýden jaltaryp júrgenin aıtyp shaǵymdanǵan. Qurylys brıgadasynyń basshysy Qalandarov birneshe ret qaryzyn tóleýdi suraǵanmen, sýdıa qurǵaq ýádemen qutyla bergen.
Joǵarǵy sottyń Іshki qaýipsizdik bólimi Qalandarovqa osy fakti boıynsha Joǵarǵy sotqa resmı ótinish túsirýdi usynǵan.
Sóıtip, Qalandarov 2018 jylǵy 5 qazanda Joǵarǵy sot tóraǵasynyń atyna hat joldaǵan. Onda 2013 jyldyń kókteminde, sol kezde Mańǵystaý oblysy Túpqaraǵan aýdandyq sotynyń tóraǵasy laýazymynda bolǵan Kenjalıev Qalandarovtyń qurylys brıgadasymen Kaspıı teńiziniń jaǵalaýynda kottedj turǵyzý týraly kelisim jasasqany jazylǵan. Jumys aıaqtalǵan soń Kenjalıev Qalandarov jáne onyń 14 jumysshydan quralǵan brıgadasyna o basta kelisilgen somany tolyq bermegen. Qaryz somasy 1 mln 800 myń teńgeni qurady.
Óz sózin rastaý úshin Qalandarov qurylys brıgadasynyń jumysshylarynyń jazbasha túsindirmelerin qosa joldaǵan.
"Sonymen qatar, Qalandarov pen Kenjalıevtiń 2018 jylǵy naýryzdaǵy kezdesýiniń vıdeojazbasy, olardyń arasyndaǵy SMS-jazbalardyń (2018 jyldyń qańtar, maýsym, tamyz aılaryndaǵy) skrınshottary usynylǵan. Onda Kenjalıev qurylysshylardan qaryzy bar ekenin moıyndap, dórekilikpen kúte turýyn talap etken. Atap aıtqanda, Qalandarovqa «túrmege jabamyn, ol jerden shyqpassyń» dep qoqan-loqy jasaǵan.
Joǵarǵy sottyń Іshki qaýipsizdik bólimi qyzmettik tekseris júrgizip, osy iske qatysy bar tulǵalardan jaýap alǵan. Olardyń bári Qalandarovtyń dálelderin rastaıdy. Tekseris nátıjeleri QR Sýdıalar odaǵy Mańǵystaý oblystyq fılıalynyń Sýdıalar ádebi jónindegi komıssııasynyń qaraýyna jiberildi.
Komıssııa Kenjalıevke qatysty tártiptik is qozǵaý týraly Sot ádilqazysyna usynys engizý úshin Mańǵystaý oblystyq sotynyń jalpy otyrysynyń prezıdıýmyna júginý týraly qaýly qabyldady. Oblystyq sottyń prezıdıýmy komıssııanyń sheshimin qoldady", - delingen Mańǵystaý oblystyq sotynyń baspasóz baıanynda.
Joǵarǵy sot janyndaǵy Sot ádilqazysynyń Tártiptik komıssııasy 2019 jyldyń 7 aqpanynda Kenjalıevti sýdıanyń ádebine qaıshy keletin, abyroıyna nuqsan keltiretin áreketi úshin Mańǵystaý oblysy Aqtaý qalalyq sotynyń tóraǵasy laýazymynan bosatyp, sýdıa ókilettigin toqtatý týraly Joǵarǵy sot keńesine júginýge sheshim qabyldady.
Joǵarǵy sot janyndaǵy Sot ádilqazysy (9 sýdıa) Kenjalıev sýdıalar etıkasy normasyn óreskel buzdy, sot júıesiniń abyroıyna nuqsa keltirdi, sol sebepti alyp otyrǵan laýazymyna laıyq emes degen sheshim shyǵardy.
