Kóterip alyp shyqty: «Semeı ormanyndaǵy» órt kezinde lagerdegi balalar qalaı evakýatsııalandy
SEMEI. KAZINFORM — Abaı oblysynda orman órtine baılanysty balalar lagerinen evakýatsııa júrgizilgen kezde polıtsııa qyzmetkerleri búldirshinderdi qaýipsiz jerge kóterip alyp shyqty.
Іshki ister mınıstrliginiń málimetinshe, orman órti týraly habar túskennen keıin tártip saqshylary órt oshaǵyna jaqyn ornalasqan balalar lagerine alǵashqylardyń biri bolyp jetken. Evakýatsııa uıymdasqan túrde ótti. Balalar kólikke deıin ertip jetkizilse, búldirshinderdi polıtseıler qoldaryna kóterip, olardy sabyrǵa shaqyryp otyrdy.
— Basty mindet — balalardyń qaýipsizdigin qamtamasyz etý jáne dúrbeleńge jol bermeý boldy. Kishkentaı balalardy polıtsııa qyzmetkerleri qoldaryna kóterip alyp shyǵyp, olardy tynyshtandyryp, qaýipsiz jerge jetkizdi. Úılesimdi árekettiń arqasynda lagerdegi barlyq tárbıelenýshi men qyzmetker der kezinde evakýatsııalandy, — dep habarlady Abaı oblysy Polıtsııa departamentiniń baspasóz qyzmetinen.
Evakýatsııa aıaqtalǵannan keıin polıtsııa qyzmetkerleri órt aýmaǵynda jumysyn jalǵastyrdy. Olar qaýipti aýmaqty qorshaýǵa alyp, órt sóndirý jáne ınjenerlik tehnıkanyń kedergisiz qozǵalysyn qamtamasyz etý úshin kireberis joldardy japty. Qazirgi ýaqytta polıtseıler jol qozǵalysyn rettep, turǵyndardyń múlkin kúzetip jatyr.
Eske salsaq, osyǵan deıin «Semeı ormany» rezervatynda órt shyqqan soń lagerdegi 200-ge jýyq bala evakýatsııalanǵany habarlanǵan.
