ÁCh-2026: Kot-d'Ivýar Ekvadordy utyp, dop dodasyn jeńispen bastady
ASTANA. KAZINFORM – Kot-d'Ivýar quramasy fýtboldan álem chempıonatyn jeńispen bastady. E tobynyń matchynda afrıkalyq komanda Ekvador quramasyn 1:0 esebimen jeńdi, dep habarlaıdy FIFA-nyń resmı saıty.
Kezdesýdegi jalǵyz gol negizgi ýaqyttyń sońǵy mınýtynda soǵyldy. Alańǵa qosalqy quramnan shyqqan Amad Dıallo qaqpanyń tómengi buryshyn dál kózdep, óz komandasyna úsh upaı syılady jáne ony top kóshbasshylyǵyna shyǵardy.
Match qaýipti sátterge toly boldy. Eki komanda jalpy tórt doby ret qaqpa baǵanasy men mańdaıshasynan qaıtty.
Birinshi taımda ekvadorlyqtar esep ashýǵa eki márte jaqyn keldi. Áýeli Djon Ieboa alystan soqqy jasap, dopty mańdaıshaǵa tıgizdi. Artynsha Alan Mında Pedro Vıteniń pasynan keıin taǵy da mańdaıshany kózdedi.
Kot-d'Ivýar quramasy da ótkir shabýyldar uıymdastyrdy. ıAn Dıomande oń qaptalda jıi qaýip tóndirse, Bazýmana Týreniń soqqysynan keıin qaqpashy Ernan Galındes sheberlik tanyttty.
Úzilisten keıin de komandalar ózara shabýyl almastyrýyn jalǵastyrdy. Ekvador shabýylshysy Enner Valensııanyń buryshtan tepken doby qaqpa baǵanasyna tıdi.
Kóp uzamaı kot-d'Ivýarlyqtar da gol soǵýǵa jaqyn boldy, alaıda Elı Vahıdiń dáldep tepken doby sál qıys ketip, mańdaıshadan qaıtty.
Match sońynda afrıkalyq komanda oıyndy óz qolyna alyp, dopty kóbirek baqylaýda ustady. Qarsylas qorǵanysyna jasalǵan qysym 90-mınýtta nátıje berip, Amad Dıallo jeńis golyn soqty.
Buǵan deıin Nıderland quramasy men Japonııa quramasy álem chempıonatynyń alǵashqy týrynda 2:2 esebimen teń túskeni habarlandy.
