Qosymsha júktemesi bar pedagogterge saýyqtyrý járdemaqysy qalaı esepteledi

ASTANA. QazAqparat – Oqý-aǵartý mınıstrligi eńbekaqy tóleý ádistemesi basqarmasynyń basshysy Gúlaıym Toqpanova qosymsha júktemesi bar pedagogterge saýqytyrý járdemaqysy qalaı esepteletinin aıtty, dep habarlaıdy QazAqparat tilshisi.

«Buryn da aıtaqymdaı saýyqtyrý járdemaqysy laýazymdy aılyq mólsherinde belgilengen. Shtattaǵy qyzmetkerlerdiń laýazymdy aılyǵy naqty bekitilgen. Normatıvtik oqý júktemesi belgilengen pedagogterdiń laýazymdyq aılyǵyn esepteý kezinde eńbek demalysyna shyqqan kezde qandaı júktememen jumys istep kelgeni esepke alynady. Bos jumys oryndary boýyna baılanysty, basqa da sebeptermen qosymsha júkteme alatyn pedagogter óte kóp. Olardyń qosymsha júktemesiniń sharttary ár túrli. Qosymsha júkteme laýazymdardy qatar atqarý shartymen alynǵan jaǵdaıda saýyqtyrý járdemaqysy tólenbeıdi. Óıtkeni laýazymdardy qatar atqarǵany úshin ústemeaqy qarastyrylǵan», - dedi ol.

Basqarma basshysy qosymsha júktemeni tolyq emes jumys kúni shartymen júkteme alǵan pedagogterdiń quqyǵyn túsindirdi.

«Al qosymsha júktemeni tolyq emes jumys kúni shartymen alǵan pedagogter zań boıynsha jeke eńbek kelisimshartyn rásimdeýi kerek. Sáıkesinshe eńbekaqy da negizgi kelisimshart boıynsha jáne tolyq emes jumys kúni sharty boıynsha jeke-jeke tólenedi. Ondaı pedagogter saýyqtyrý járdemaqysyn negizgi jumys orny boıynsha bólek, tolyq emes jumys kúni sharty boıynsha bólek alady», - dedi Gúlaıym Toqpanova.