Qosymsha ýaqytyn bólgen memlekettik qyzmetkerge bonýs nemese basqa tólemder kózdelgen - C. Ahmetjanov
ASTANA. QazAqparat - Memlekettik organnyń qajetti mindetterin atqarýǵa baılanysty qosymsha ýaqytyn bólgen memlekettik qyzmetkerge bonýs nemese basqa tólemder kózdelgen. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Memlekettik qyzmet isteri mınıstrliginiń jaýapty hatshysy Saıan Ahmetjanov málim etti.
Baspasóz máslıhaty barysynda jaýapty hatshyǵa «memlekettik qyzmetkerler kóbinese jumys ornynda qyzmetin túnge sheıin atqaratyndyǵyna baılanysty olarǵa bonýstar qarastyryla ma?» degen saýal qoıyldy.
«Jańa reformanyń, zańnamanyń qaǵıdattaryna sáıkes, memlekettik qyzmetkerlerdiń eń birinshiden áleýmettik jeke quqyqtary saqtalýda. Ol eńbek normalaryna saı qosymsha memlekettik organnyń qajetti mindetterin atqarýǵa baılanysty ýaqytyn bólgenine qosymsha bonýs retinde nemese basqa tólemder kózdelgen», -dedi S. Ahmetjanov.
Onyń sózine qaraǵanda, osy másele boıynsha jańa eńbek tólem júıesi ázirlenýde. «Ol 2017 jyldyń 1 qańtarynan bastap kúshine enedi»,-dedi
Aıta keteıik, jaqynda Memleket basshysy Nursultan Nazarbaevtyń «Ult jospary - qazaqstandyq armanǵa bastaıtyn jol» atty maqalasy jarııalanǵan bolatyn.
«Memlekettik qyzmetshige eńbekaqy tóleýdiń jańa júıesi onyń biliktiligi men atqaratyn jumysynyń sıpatyna, kólemi men nátıjesine baılanysty zań turǵysynan bekitiledi. Asa nátıjeli qyzmet úshin bonýstar tóleý qarastyrylǵan. Mundaı júıeni 2017 jyldyń 1 qańtarynan bastap engizý josparlanyp otyr. Bul jerde 2016 jyly búginde «B» korpýsyna kiretin memlekettik qyzmetshilerdiń eńbekaqysy joǵarylaıtynyn aıta ketý kerek»,-dep atap ótti QR Prezıdenti.
