Qosymsha bilim granttary qalaı taratyldy - BǴM
ASTANA. QazAqparat - QR Bilim jáne ǵylym vıtse-mınıstri Talǵat Eshenqulov qosymsha bilim granttarynyń qaı mamandyqtarǵa taratylǵanyn aıtyp berdi, dep xabarlaıdy QazAqparat tilshisi.
Vıtse-mınıstrdiń aıtýynsha, bıyl «Atameken» ulttyq kásipkerler palatasynyń usynysymen kásibı-texnıkalyq bilimnen keıin joǵary bilim alýǵa múmkindik beretin granttardyń sany 3,4 esege artty. Osylaısha, atalǵan granttardyń sany 3 488-ge jetti.
«Budan bólek, barlyq memlekettik tapsyrystyń ishinde 5 myń grant «Máńgilik el jastary ındýstrııaǵa» baǵdarlamasy aıasynda qarastyrylǵan. «Bolashaqqa baǵdar: Rýxanı jańǵyrý» maqalasynyń negizgi máselelerin iske asyrý maqsatynda gýmanıtarlyq jáne áleýmettik mamandyqtardyń qajettilikteri de eskerildi», - dedi T.Eshenqulov Májiliste ótken dóńgelek ústelde.
Onyń sózine qaraǵanda, byltyr Prezıdenttiń tapsyrmasy boıynsha bólingen qosymsha 20 myń bilim granty da eńbek naryǵyna qaraı taratyldy. Sonyń ishinde 11 myń grant texnıkalyq mamandyqtarǵa bólinse, 5 myń grant pedagogıka, jaratylystaný, gýmanıtarlyq jáne áleýmettik mamandyqtarǵa berildi.
«3 myń grant - magıstratýraǵa, al 1 myń grant PhD doktorlaryn daıarlaýǵa bólindi. Sonymen qatar, texnıkalyq jáne aýyl sharýashylyǵy mamandyqtary boıynsha bir adamdy daıyndaý shyǵyndardy 346 myń teńgeden 635 myńǵa artty. Al memlekettik tapsyrysty taratý kezinde texnıkalyq jáne texnologııalyq mamandyqtarǵa basymdyq beriledi. Sonyń ishinde aqparattyq texnologııalar, bıotexnologııa, elektronıka men telekommýnıkatsııadar sııaqty mańyzdy salalar bar. Jalpy, sońǵy úsh jyldyń ishinde memlekettik tapsyrystyń kólemi 1,7 esege ósti», - dep atap kórsetti T.Eshenqulov.
Aıta keteıik, bıyl bilim granttaryn taǵaıyndaý júıesinde ózgerister bolady. Joǵary oqý oryndaryn jan basyna qaraı qarjylandyrý júıesine basymdyq beriledi. Máselen, UBT-da joǵary upaı alǵan mektep túlegi qaı oqý ornyn tańdasa, sol jerge grant beriledi. Budan bólek, mektep túlekterine mamandyqty tańdaý jaǵy jeńildeı túsedi.
