Qostóbedegi tótenshe jaǵdaıdan keıin Talas ózenine bóget salyndy
TARAZ. QazAqparat - Baızaq aýdany Qostóbe aýylynda turǵyn úılerdi sý basýdyń aldyn alý úshin az ýaqytta Talas ózeninde bóget turǵyzylady, dep habarlady QazAqparat.
Bul týraly óńirlik kommýnıkatsııalar qyzmetinde ótken brıfıngte belgili boldy. Jýrnalısterdiń saýaldaryna Baızaq aýdanynyń ákimi Murathan Shókeev jáne QR Aýylsharýashylyǵy mınıstrligi sý resýrstary Komıtetiniń sý resýrstaryn paıdalanýdy retteý jáne qorǵaý jónindegi Shý-Talas basseındik ınspektsııasynyń basshysy Jumabek Muhatov jaýap berdi.
Buryn habarlanǵandaı, 5 qazanda Baızaq aýdanynda jergilikti kólemde tótenshe jaǵdaı engizilgen. Talas ózenide sý tasyp Qostóbe aýylyndaǵy turǵyn úılerdi sý alyp ketken. Bul Kırov sý qoımasynan mólsherden tys sý jiberý saldarynan boldy.
«Tótenshe jaǵdaı saldaryn joıý úshin azamattyq qorǵanys boıynsha aýdandyq bólimniń 10 qyzmetkeri, Jambyl oblystyq tótenshe jaǵdaılar qyzmetiniń 10 qyzmetkeri, Qostóbe aýylynyń 25 turǵyny tartyldy, - dedi J. Muhatov. - Sonymen qatar 12 tehnıka jumyldyryldy».
«Talas» temirjol stansasynan Taraz stansasyna deıingi tas jolda júk kólikteriniń júrýine ýaqytsha shekteý qoıyldy. Jergilikti atqarýshy organdar men Tótenshe jaǵdaılar qyzmeti táýlik boıy oqıǵa ornyn baqylaýda, dep atap ótti Baızaq aýdanynyń ákimi.
Jambyl oblystyq ákimdigi Qyrǵyzstan Respýblıkasynyń Talas oblysynyń ákimshiligimen birlese Kırov sý qoımasynan sý jiberýdi azaıtý múmkindigi týraly másele qarastyrylyp jatyr.
