Kostenko shahtasynyń elektr dánekerleýshisi Aıbar Qosanovqa «Eńbek Dańqy» ordeni tabystaldy
QARAǴANDY. KAZINFORM – Qaraǵandy oblysynyń ákimi Kostenko atyndaǵy shahtanyń elektr dánekerleýshisi Aıbar Qosanovqa Memleket basshysynyń atynan «Eńbek Dańqy» ordenin tabys etti. Ol konveıerlik shtrektegi tútindi jalǵyz ózi joıǵan bolatyn.
Esterińizge sala keteıik, 2 mamyr kúni keshke Kostenko atyndaǵy shahtadaǵy K3 qabatynyń 4-shi konveıerlik shtregindegi tútin shyqqan bolatyn. Konveıerlik shtrek ýchaskesiniń elektr dánekerleýshisi Aıbar Qosanov alǵashqy órt sóndirý quraldarynyń kómegimen tútindi joıdy.
Sonymen qatar shahtanyń basqarý bólmesinde tútin týraly eskertý júıesi de iske qosylǵan bolatyn. Tútin joıylǵanyna qaramastan, evakýatsııa josparyn engizý jáne 194 kenshini jer betine shyǵarý týraly sheshim qabyldandy. Aldyn ala boljam boıynsha, tútinniń paıda bolýyna tómengi keneptiń rolıgine bógde zattyń túsýi, sonyń saldarynan rolıktiń jumysy buǵattalýy sebep boldy. Bul konveıer taspasynyń tútindeýine ákep soqqan.
Búgin el Prezıdenti Qasym-Jomart Toqaev Kostenko atyndaǵy shahtanyń jerasty ýchaskesiniń elektr slesari Aıbar Qosanovty ІІІ dárejeli «Eńbek Dańqy» ordenimen marapattady.
«Aıbar tapqyrlyq tanytty. Ol shahtada bolýy múmkin qaıǵyly oqıǵanyń aldyn aldy. Eńbegińiz úshin raqmet, ata-anańyzǵa osyndaı ul tárbıelegeni úshin raqmet», - dedi Qaraǵandy oblysynyń ákimi Ermaǵanbet Bólekpaev.
Aıta ketý kerek, 28 qazanda bul shahtada gaz-aýa qospasy jarylǵan bolatyn. Saldarynan 46 kenshi qaza tapty. Qaıǵyly oqıǵanyń áli izi sýı qoımaǵanany qaramastan, Aıbar esh júreksinbesten, taǵy bir oqıǵanyń aldyn aldy. Shahta basshylyǵy onyń erligine rıza.
«Aıbar tez jınaqtalyp, shapshań áreket etti. 750 metrge deıin júgirip ótti. Bul – erlik. Eger ol bolmasa, oqıǵa saldaryn boljaý múmkin bolmas edi. Ol arnaıy daıyndyqtan ótken joq, sondyqtan ol jerge barýǵa mindetti emes edi. Biraq qaýipke qaramaı, áriptesterin qutqardy», - deıdi Kostenko shahtasynyń dırektory Denıs Dymov.
«Men tútin týraly estigen boıda birden 700 metr tómenge qaraı júgirdim. Tútindi kórgende eki órt sóndirgishti alyp, oshaqqa qaraı bardym. Ol kezde eshteńe oılamadym. Men tek adamdardy qutqarǵym keldi. Tipti, otbasym týraly da oılamadym», - deıdi Aıbar Qosanov.
Aıbar Qosanov 38 jasta. Ol Shet aýdanynyń týmasy. Kostenko shahtasynda qyzmet etip jatqanyna úsh jyl boldy. Jubaıymen eki bala tárbıelep otyr.
