Kostenko shahtasyndaǵy qaıǵyly oqıǵaǵa kináliler 8 jylǵa deıin bas bostandyǵynan aıyrylýy múmkin
QARAǴANDY. KAZINFORM - Kostenko shahtasyndaǵy jarylysqa qatysty sotqa 106 tomdyq is jiberildi. Aıyptalýshylar 8 jylǵa deıin bas bostandyǵynan aıyrylýy múmkin, dep habarlaıdy Kazinform tilshisi.
Qaraǵandy oblysynyń prokýratýrasy Kostenko shahtasynda kenshilerdiń qaza tabýyna qatysty 106 tomdyq qylmystyq isti sotqa jiberdi.
Sotqa deıingi tergeýdi Bas prokýratýranyń arnaıy prokýrorlary Іshki ister mınıstrligi, Sybaılas jemqorlyqqa qarsy is-qımyl agenttigi, Qarjylyq monıtorıng agenttigi jáne Tótenshe jaǵdaılar mınıstrligi qyzmetkerleriniń qatysýymen júrgizdi.
«Tergeý barysynda jazataıym oqıǵaǵa taý-ken jumystary kezinde qaýipsizdik erejeleriniń jappaı buzylýy sebep bolǵany anyqtaldy. Kómir óndirý alańyndaǵy jarylys, shoǵyrlanýy ruqsat etilgen standarttardan aıtarlyqtaı asyp ketken kómir shańynyń jarylystarynyń tizbekti reaktsııasyn týdyryp, 46 kenshi qaza taýyp, 28 kenshi jaraqattandy.
Shahta basshylyǵy men ınjenerlik-tehnıkalyq qyzmetkerler qatarynan 10 adam qylmystyq jaýapqa tartyldy. Barlyǵy qamaýda. Olarǵa Qazaqstan Respýblıkasy Qylmystyq kodeksiniń 277-babynyń 3-bóligi boıynsha («taý-ken jumystary kezinde qaýipsizdik erejelerin buzý») aıyp taǵyldy, atalǵan bap boıynsha 8 jylǵa deıin bas bostandyǵynan aıyrý jazasy qarastyrylǵan», - dep málimdedi Qaraǵandy oblysynyń prokýratýrasy.
Іs boıynsha 74 adam jábirlenýshi retinde tanyldy.
Materıaldar negizi boıynsha qaraý úshin Qaraǵandy qalasynyń Álıhan Bókeıhan aýdandyq sotyna jiberildi.
Qaraǵandy oblysy Kostenko shahtasyndaǵy 46 kenshiniń qazasyna qatysty is sotqa joldanǵany týraly keshe Bas prokýror Berik Asylov málimdegen edi.
Eske salsaq, 28 qazan saǵat 2:33-te Qaraǵandy oblysyndaǵy Kostenko atyndaǵy shahtada apat boldy. Apat kezinde shahtada 252 adam bolǵan, jer betine 205 shahter shyǵaryldy.
Qazaqstan Prezıdenti Qasym-Jomart Toqaev qaza tapqan kenshilerdiń týǵan-týystary men jaqyndaryna kóńil aıtyp, zardap shekkenderdiń tezirek saýyǵyp ketýin tiledi.
Úkimetke kenshilerdiń otbasylaryna barlyq qajetti kómek kórsetýdi tapsyrdy. Oqıǵanyń mán-jaıyn anyqtaý úshin úkimettik komıssııa quryldy.
Sondaı-aq, «ArselorMıttalTemirtaý» kompanııasymen ınvestıtsııalyq yntymaqtastyqty toqtatý tapsyryldy.