Kostenko shahtasyndaǵy apat: prokýrorlar aıyptalýshylarǵa eń qatań jaza surady
QARAǴANDY. KAZINFORM — Qaraǵandyda Kostenko atyndaǵy shahtadaǵy jarylysqa qatysty sot protsesi sheshýshi kezeńge jetti. Bul sońǵy jyldardaǵy kómir salasyndaǵy eń iri apat sanalady: 2023 jylǵy kúzde jer asty jumystarynda 46 shahter qaza taýyp, 20-ǵa jýyq adam múgedek bolyp qaldy.
Sot protsesi máresine jetip qaldy — ekijaqtyq pikirtalas
Sot protsessi erekshe jaǵdaıda — tergeý ızolıatorynyń sport zalynda ótip jatyr. Aıyptalýshylar qatarynda on adam bar: shahtanyń basshylary men mamandary. Olardyń toǵyzy eki jyldan astam ýaqyt ızolıatorda otyr, bireýi — úı qamaǵynda. Olarǵa taý-ken jumystaryn júrgizý kezinde qaýipsizdik erejelerin buzǵany, eki nemese odan kóp adamnyń ólimine sebep bolǵany úshin aıyp taǵylyp otyr (QK RK 277-baby, 3-bólimi). Jaza merzimi — úsh jyldan segiz jylǵa deıin bas bostandyǵynan aıyrý.
Prokýratýra usynǵan jaza
Memlekettik aıyptaýshylar Ádil Sadyqov pen Bekzat Áshirbekov árbir aıyptalýshynyń kinási kýágerlerdiń túsindirmesi, saraptama qorytyndylary, úkimettik komıssııa aktileri jáne dıspetcherlik sóılesýler jazbalarymen rastalatynyn aıtty.
— Jer asty jumystarynda shaıý men kúldený jumystary formaldy júrgizilgen, jabdyqtar isten shyǵyp turǵan, metan kontsentratsııasy normadan joǵary boldy. 2023 jylǵy qyrkúıekte óndirý ýchaskelerinde órt shyqqanymen, tehnıkany jóndemeı, kómir alýdy jalǵastyrǵan. Jarylys bolǵannan keıin taqtatas qaqpaqtary jumys istemegen. On basshy muny qalaı bilmeı qaldy, — dedi prokýror Sadyqov.
Ol sottan aıyptalýshylarǵa eń joǵarǵy merzimdi taǵaıyndaýdy surady:
8 jyl — óndiris jónindegi orynbasar Vadım Eremınge, bas ınjener Nıkolaı Groznovqa, 6-ýchaske bastyǵy Vıktor Koptenkovqa;
7 jyl — ótý boıynsha bas ınjenerdiń orynbasary Vladımır Gonnochenkoǵa, qaýipsizdik tehnıkasy boıynsha bas ınjenerdiń orynbasary Dmıtrıı Fedorenkoǵa, bas mehanık Dmıtrıı Kotsarǵa, shań jarylysqa qarsy qyzmet kómekshisi Vıtalıı Pestrıatakqa jáne konveıer kóligi ýchaske bastyǵy Tólegen Ǵabdýshevke;
6 jyl — jeldetý jáne qaýipsizdik tehnıkasy ýchaske bastyǵy Vladımır Shıshkanovqa.
Prokýrorlar qamaýda ótkizgen ýaqytty merzimge qosyp esepteýdi usyndy — kópshiligi úshin bul 1 jyl 8 aıǵa teń.
Qorǵaýshylar nusqasy
Qaýipsizdik tehnıkasy boıynsha bas ınjenerdiń burynǵy orynbasary Dmıtrıı Fedorenko ózine taǵylǵan aıyptardy negizsiz dep atap, onyń laýazymdyq mindetteri tergeýdiń aıtýynsha buzylǵan normalarǵa qatysy joq ekenin aıtty. Sondaı-aq sensor derekteri gaz kontsentratsııasynyń joǵarylaǵanyn rastamaıtynyn, jarylys sebebin úıindi bólikten anyqtaý múmkin bolmaǵanyn erekshe atap ótti.
Vadım Eremınniń jubaıy sotta apatqa adamı faktor sebep bolýy múmkin ekenin, mysaly, joldamamen kelgen jumysshylardyń erejelerdi buzýy yqtımaldyǵyn aıtyp, shahta basshylyǵyna barlyq kináni artý ádiletsiz ekenin atap ótti.
Qaıǵyly oqıǵanyń hronologııasy
Kostenko atyndaǵy shahtadaǵy jarylys 2023 jylǵy 28 qazanda tańerteń boldy.
Resmı málimet boıynsha, metan gazynyń detonatsııasy kómir shańynyń jarylys tizbegin shaqyrǵan, onyń kontsentratsııasy ruqsat etilgen normadan edáýir joǵary boldy.
Apat kezinde jer astyda 252 adam bolǵan. 205 shahter jer betine shyǵaryldy. Jeti adam denesi birden tabyldy, biraq bir saǵat ishinde qurban sany onǵa jetti. 31 qazanda 46-shy shahterdiń denesi tabyldy.
Qaıǵyly oqıǵa ornyna Qaraǵandyǵa Prezıdent Qasym-Jomart Toqaev kelip, qaza bolǵandardyń otbasylaryna kóńil aıtty jáne «ArselorMıttal Temirtaý» kompanııasymen yntymaqtastyqty toqtatýdy tapsyrdy.