Kostenko shahtasyndaǵy apat: 10 aıyptalýshy 5 jyldan 8 jylǵa deıin bas bostandyǵynan aıyryldy
QARAǴANDY. KAZINFORM — Qaraǵandyda 46 kenshiniń ómirin qıǵan Kostenko atyndaǵy shahtadaǵy jarylysqa qatysty sot protsesi aıaqtaldy.
Qaraǵandyda 2023 jyldyń kúzinde Kostenko atyndaǵy shahtada oryn alǵan qazaǵa qatysty sot protsesi aıaqtaldy. Jarylys saldarynan 46 kenshi jer astynda mert bolǵan edi.
Alıhan Bókeıhan atyndaǵy aýdandyq sottyń sýdıasy Bahtııar Ahanov kenshilerdiń ólimine ákelgen apatqa baılanysty úkimin jarııalady. Aıyptalýshylar qatarynda 10 adam.
Sot úkimine sáıkes kelesideı jaza kesildi:
Sergeı Mýstıvko, Kostenko atyndaǵy shahta dırektory — 8 jyl bas bostandyǵynan aıyryldy;
Vadım Eremın, óndiris jónindegi dırektordyń orynbasary — 7 jyl;
Nıkolaı Groznov, bas ınjener — 7 jyl;
Vıktor Koptenkov, № 6 ýchaske bastyǵy — 7 jyl;
Vladımır Gonnochenko, qazba jumystary jónindegi bas ınjenerdiń orynbasary — 6 jyl 6 aı;
Dmıtrıı Fedorenko, eńbekti qorǵaý jónindegi bas ınjenerdiń orynbasary — 6 jyl;
Vladımır Shıshkanov, jeldetý jáne eńbekti qorǵaý ýchaskesiniń bastyǵy — 5 jyl;
Dmıtrıı Kotsar, bas mehanık — 6 jyl;
Vıtalıı Pestrıatak, shań-jarylysqa qarsy qorǵaý ýchaske bastyǵynyń kómekshisi — 6 jyl;
Tólegen Ǵabdúshev, konveıerlik tasymaldaý ýchaskesiniń bastyǵy — 5 jyl.
Eske salsaq, Kostenko atyndaǵy shahtadaǵy jarylys 2023 jylǵy 28 qazanda tańerteń boldy. Resmı málimet boıynsha, metan gazynyń detonatsııasy kómir shańynyń jarylys tizbegin shaqyrǵan, onyń kontsentratsııasy ruqsat etilgen normadan edáýir joǵary boldy.
Apat kezinde jer astyda 252 adam bolǵan. 205 shahter jer betine shyǵaryldy. Jeti adam denesi birden tabyldy, biraq bir saǵat ishinde qurban sany onǵa jetti. 31 qazanda 46-shy shahterdiń denesi tabyldy.
Qaıǵyly oqıǵa ornyna Qaraǵandyǵa Prezıdent Qasym-Jomart Toqaev kelip, qaza bolǵandardyń otbasylaryna kóńil aıtty jáne «ArselorMıttal Temirtaý» kompanııasymen yntymaqtastyqty toqtatýdy tapsyrdy.
Osyǵan deıin aldaǵy sot otyrysynda prokýrorlar aıyptalýshylarǵa eń qatań jaza suraǵany jaıly jazǵan bolatynbyz.