Kostenko shahtasyndaǵy 46 kenshiniń qazasy: úkim ózgerissiz qaldy
QARAǴANDY. KAZINFORM – Qaraǵandy oblysyndaǵy eń rezonansty qylmystyq isterdiń biri boıynsha apellıatsııalyq sot túpkilikti sheshim qabyldady. Birinshi satydaǵy sot úkimi zańdy dep tanylyp, tolyq kólemde oryndalýǵa jatady dep sheshildi.
Qaraǵandy oblystyq sotynyń baspasóz qyzmetiniń málimetinshe, 17 jeltoqsanda qylmystyq ister jónindegi sot alqasy Kostenko atyndaǵy shahtada bolǵan jarylysqa qatysty sottalǵandar men olardyń qorǵaýshylary bergen apellıatsııalyq shaǵymdy qarastyrdy. Nátıjesinde Qaraǵandy qalasy Álıhan Bókeıhan aýdany sotynyń 2025 jylǵy 15 tamyzda shyǵarǵan úkimi ózgerissiz qaldyrylyp, zańdy kúshine endi.
Qylmystyq is shahtanyń on laýazymdy qyzmetkerine qatysty qozǵalǵan. Olardyń qatarynda shahta dırektory, dırektordyń orynbasary, bas ınjener, jarylys bolǵan ýchaskeniń basshysy, birqatar ýchaske jetekshileri, bas mehanık jáne eńbek pen tehnıka qaýipsizdigine jaýapty mamandar bar. Barlyǵy taý-ken jumystaryn júrgizý kezindegi qaýipsizdik talaptaryn óreskel buzyp, abaısyzda eki jáne odan da kóp adamnyń qaza tabýyna, sondaı-aq kenshilerdiń densaýlyǵyna aýyr jáne ortasha aýyr zııan keltirýge jol bergeni úshin kináli dep tanyldy (QR QK 277-babynyń 3-bóligi).
Sot barysynda ónerkásiptik, órt jáne eńbek qaýipsizdigi qaǵıdalarynyń saqtalmaýy jarylysqa sebep bolǵany anyqtaldy. Sonyń saldarynan 46 kenshi qaza taýyp, taǵy 26 adam kómir shańynyń janýynan paıda bolǵan jarylys tolqyny men kómirtek totyǵynyń áserinen ártúrli dárejedegi jaraqat alǵan.
Úkimge sáıkes, shahta dırektory 8 jylǵa bas bostandyǵynan aıyryldy. Onyń orynbasaryna, bas ınjenerge jáne ýchaske basshylarynyń birine 7 jyl jaza taǵaıyndaldy. Aıyptalýshylardyń birine 6 jyl 6 aı, taǵy úsheýine 6 jyl, al ekeýine 5 jyl bas bostandyǵynan aıyrý jazasy kesildi. Sonymen qatar sottalǵandarǵa úsh jyl merzimge taý-ken óndirý salasynda basshylyq qyzmet atqarýǵa tyıym salyndy.
Oblystyq sotta birinshi satydaǵy sot úkimin ózgertýge nemese kúshin joıýǵa quqyqtyq negizder anyqtalmaǵany atalyp ótti.