Kostenko shahtasynan 42 kenshiniń denesi tabyldy

Saǵat 15:00-degi jaǵdaı boıynsha Kostenko shahtasynan 42 adamnyń denesi tabyldy, 4 kenshini izdeý jalǵasýda, dep habarlaıdy Kazinform QR TJM baspasóz qyzmetine silteme jasap. 

Avarııany joıý jónindegi respýblıkalyq jedel shtabtyń basshysy — Tótenshe jaǵdaılar mınıstri general-maıor Syrym Sháriphanov shahtaǵa tústi. Órt jáne kenshilerdiń qaza bolǵan jerlerdi tekserý júrgizildi.

Avarııany joıý jónindegi jedel shtab táýlik boıy izdestirý-qutqarý jumystaryn úılestirýde. Eń qaýipsiz jáne kenshiler bolýy múmkin yqtımal ýchaskeler boıynsha taý-ken qutqarýshylarynyń ótý joldary pysyqtalýda.

Іzdestirý jumystary shamamen bir-birinen 4 km qashyqtyqta ornalasqan eki óndirý ýchaskesiniń aýdanynda júrgizilýde.

Taý-ken qutqarýshylary qajetti jabdyqtarmen jáne baılanys quraldarymen qamtamasyz etilgen.

Gaz jaǵdaıyn baqylaý jalǵasýda.

Іzdestirý-qutqarý jumystaryna barlyǵy «Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby» JShS Qaraǵandy fılıalynyń 55 taý-ken qutqarýshysy jáne 15 tehnıkasy jumyldyryldy.

Shuǵyl medıtsınalyq kómekti qamtamasyz etý úshin 21 adam jáne 7 birlik jedel medıtsınalyq járdem tehnıkasy jumyldyryldy.

Budan basqa, TJM jáne Qaraǵandy oblysynyń TJD-da respýblıkalyq jáne oblystyq jedel shtabtar jumys isteıdi.