Kostenko shahtasy tútindep, 200-ge jýyq kenshi evakýatsııalandy

QARAǴANDY. KAZINFORM — Qaraǵandy oblysyndaǵy Kostenko shahtasynda taǵy da órt tutandy. 

Tótenshe jaǵdaı mınıstrliginiń málimetinshe, Qaraǵandyda Kostenko atyndaǵy atyndaǵy shahtada 4 konveıer shtregi tútindegen.

Byqsýdy alǵashqy órt sóndirý quraldarynyń kómegimen konveıer trassasynyń elektr slesary Aıbar Qosanov sóndirdi.

Kenshi oqıǵa týraly habarlap jatqanda shahtanyń basqarý bólmesinde tútin sıgnalızatsııasy iske qosylǵan.

Saǵat 19:45–te sıgnalızatsııaǵa baılanysty tútin sóndirilgenine qaramastan evakýatsııa jospary boıynsha shahtadaǵy 194 kenshini syrtqa shyǵarý jóninde sheshim qabyldanǵan.

Saǵat 21:47–de 187 kenshi jer betine shyǵaryldy.

Oqıǵany baqylaý jáne shahtanyń tynys-tirshiligin qamtamasyz etý úshin ýchaske basshylary men jetekshilerinen 7 jumysshy ornynda qaldy.

Aldyn ala sebep — tómengi tósemniń rolıgine bógde zat túsip, onyń jumysyn toqtatyp tastaǵan. Sodan konveıer lentasy byqsyǵan.  

Eske salsaq, ótken jyly 28 qazan saǵat 2:33–te Qaraǵandy oblysyndaǵy Kostenko atyndaǵy shahtada apat bolyp, 46 kenshi qaza tapty. Apat kezinde shahtada 252 adam bolǵan, jer betine 205 shahter shyǵaryldy.

Osy qaıǵyly oqıǵaǵa baılanysty Qazaqstanda 29 qazan Jalpyulttyq aza tutý kúni bolyp jarııalandy.

Qazaqstan Prezıdenti Qasym-Jomart Toqaev qaza tapqan kenshilerdiń týǵan-týystary men jaqyndaryna kóńil aıtyp, zardap shekkenderdiń tezirek saýyǵyp ketýin tiledi.

Úkimetke kenshilerdiń otbasylaryna barlyq qajetti kómek kórsetýdi tapsyrdy. Oqıǵanyń mán-jaıyn anyqtaý úshin úkimettik komıssııa quryldy. Sondaı-aq, «ArselorMıttalTemirtaý» kompanııasymen ınvestıtsııalyq yntymaqtastyqty toqtatý tapsyryldy.

9 jeltoqsanda shahtadaǵy jarylysqa ulasqan órttiń sebepterin tekserý jónindegi Úkimet komıssııasynyń qorytyndy otyrysy ótti. Komıssııa jumysynyń qorytyndysy boıynsha jumys berýshiniń kinási 100% anyqtalyp, jumysty qaýipsiz oryndaý talaptaryn buzǵan 19 jaýapty tulǵa anyqtaldy.