Kostenko atyndaǵy shahtadaǵy jaǵdaı áli de qaýipti - Gennadıı Sılınskıı

Kásibı áskerılendirilgen apattyq-qutqarý qyzmetteriniń Respýblıkalyq ortalyq shtaby Qaraǵandy fılıaly dırektorynyń birinshi orynbasary Gennadıı Sılınskıı shahtadaǵy apat saldaryna qatysty túsinik berdi, dep habarlaıdy Kazinform tilshisi Rýslan Ǵabbasov oqıǵa ornynan.

«Qazir úsh mindetti sheship jatyrmyz. Birinshiden, shahtadaǵy apatty ýchaskedegi órtti sóndirý jalǵasyp jatyr. Sonymen qatar, zardap shekkender qaýipsiz jerge kóshirilýde. Budan bólek, shahtanyń shyǵys bóliginde qalyp qoıǵan kenshilerdi izdestirip jatyrmyz», - dedi Gennadıı Sılınskıı.
Onyń aıtýynsha, shahtadaǵy jaǵdaı áli de qaýipti. Sebebi ol jerde jınaqtalǵan gaz jarylyp, kómirtek totyǵy taralǵan.
«Sondyqtan tıisti is-qımyldar jasalyp jatyr. Biraq áli de qaýip bar. Qazir boljam aıtý qıyn. Shahtanyń ishinde qubyrdaǵy aqaý saldarynan, gazǵa qatysty ahýal qıyndaýy múmkin. Jaqyn arada apatty ýchaskeden zardap shekkenderdi evakýatsııalaýdy aıaqtaımyz. Osydan keıin bar kúsh-jigerimizdi órtti sóndirýge jumyldyramyz», - dedi fılıal dırektorynyń birinshi orynbasary.

Onyń aıtýynsha, apat sebebin úkimettik komıssııa anyqtaıdy.

Budan buryn habarlanǵandaı, shahtada qaza tapqan 28 kenshi tabyldy. Qalǵan 18 adam izdestirilip jatyr.