Qostanaılyqtarǵa aıazǵa baılanysty qaladan shyqpaýǵa keńes berildi
QOSTANAI. QazAqparat - Qostanaı oblysynda qatty aıazǵa baılanysty dızeldik kólikter úshin tas joly jabylyp, mektepterde sabaq berý toqtatyldy. Aýrýhanalarǵa úsik shalǵan naýqastar kelip túsýde, dep habarlaıdy «QazAqparat» HAA tilshisi.
Tańerteń oblys ortalyǵynda aýa temperatýrasy -38 gradýsty kórsetken. Qostanaı oblystyq ІІD baspasóz qyzmeti málimdegendeı, «aýa raıynyń qolaısyzdyǵy saldarynan dızeldik janarmaı qoldanatyn kólikter úshin oblystyq jáne respýblıkalyq joldar jabyldy. Qalǵan turǵyndarǵa qatty qajettilik bolmasa, qaladan shyqpaýǵa keńes berildi».
Qostanaı oblystyq bilim berý bólimi mekteptegi sabaqtardyń barlyǵyn toqtatý týraly habarlama taratty. Qalalyq aýrýhananyń travmatologııalyq pýnktine úsik shalǵan eki adam kelip tústi. Travmatologııalyq bólimniń meńgerýshisi Maral Ábilqasymovanyń aıtýynsha, zardap shekkender alkogoldik ishimdik paıdalanǵan, 2-3 dárejedegi úsik shaldy degen dıagnoz qoıyldy.
