Qostanaılyqtar jol sapasy týraly telefon arqyly aqparat bere alady
QOSTANAI. QazAqparat - Oblys turǵyndary ózderin tolǵantyp júrgen máselelerin messendjer arqyly jetkize alady. Bul týraly memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamentinde ótken jıynda aıtyldy, dep habarlaıdy QazAqparat.
Departament basshysy mindetin atqarýshy Ashat Eskendirov «Qoǵamdyq baqylaý kartasy» jobasyn iske asyrýdaǵy eń mańyzdy tetikterdiń biri tsıfrlandyrý baǵytyn jedeldetý ekenin atap ótti.
«Eger shalǵaı aýyldardaǵy joldyń sapasy nashar bolsa nemese sý qubyry iske qosylmaı tursa, onda kez kelgen turǵyn máseleni messendjer arqyly jetkize alady. Munan soń arnaıy qurylǵan top problemanyń mán-jaıyn anyqtaıdy. Bul arqyly azamattardyń tsıfrlandyrýdaǵy múmkindikterin arttyrýǵa bolady. Bir jaǵynan memlekettik organdar men kvazımemlekettik sektor sýbektileriniń jumysyn qadaǵalaýǵa múmkindik alamyz. «Qoǵamdyq baqylaý kartasy» naǵyz halyqtyq joba bolmaq», - deıdi A.Eskendirov.
«Qoǵamdyq baqylaý kartasy» úsh baǵytta júzege asatyn bolady. Birinshiden, áleýmettik jeliler arqyly keri baılanys ornatylady. Ekinshiden, turǵyndarǵa Qamqor mobıldik qosymshasy kómekke keledi. Sondaı-aq, baqylaý kartasy aımaqtyq monıtorıng toptarynyń qatysýymen júrgiziledi.
«Monıtorıng júrgizetin toptar oblystyq mańyzy bar qalalar men aýdan ortalyqtarynda quryldy. Top quramyna shalǵaı aýyldardyń ókilderi de qosyldy. Olar arnaıy irikteýden ótti», - dedi aımaqtyq monıtorıng tobynyń basshysy Dınara Ótebaeva.
Brıfıngte aıtylǵandaı, «Qoǵamdyq baqylaý kartasy» - pılottyq joba. Búginde áleýmettik jelilerde paraqshalar ashylyp, arnaıy messendjer jumys istep tur. Messendjer (WhatsApp) nómiri - 8-707-602-1424. sýreti poshtada
