Qostanaılyqtar tumaýǵa qarsy tegin egilip jatyr
QOSTANAI. QazAqparat – Qostanaı oblysynda tumaýǵa qarsy ımmýndaý kampanııasy bastaldy, dep habarlaıdy QazAqparat oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentine silteme jasap.
Departament mamandary «táýekel» tobyn quryp, oǵan engen azamattar ekpeni tegin alatyn bolady. Atalmysh topqa medıtsınalyq qyzmetkerler, jıi aýyratyn jáne dıspanserlik esepte turǵan balalar, jabyq mekemelerdiń tárbıelenýshileri, qarttar úıleriniń turǵyndary, sozylmaly aýrýlarmen, júrek-tamyr júıesi men tynys alý organdary aýrýlarymen aýyratyn adamdar, júktiligi belgili bir merzimdegi áıelder jatady.
«Ákimdik qarajat bólip, Reseıde shyǵarylǵan «Grıppol plıýs» vaktsınasynyń 60 myń dozasy satyp alyndy. Tumaýǵa qarsy ekpeni jylda alý qajet. Sebebi tumaý vırýsy kóbeıe beredi jáne túrleri de ózgerip turady. Ózge ınfektsııalarǵa sııaqty oǵan qarsy ómir boıyna ımmýnıtet alý múmkin emes. Bıylǵy epıdemııalyq maýsymda tumaý vırýsynyń 4 shtamm aınalymy kútilýde. Olar: A/Brisbane (H1N1), A/Kansas (H3N2), B/Colorado jáne B/Phuket. Vaktsınatsııanyń usynylatyn kezeńi – qazan men qarasha aılary, ımmýnıtet 14 kúnnen keıin qalyptasa bastaıdy jáne jyl boıyna saqtalady», - delingen vedomstvonyń aqparatynda.
Mamandardyń sózinshe, tumaý aýyr klınıkalyq kórinisimen erekshelenedi. Dene temperatýrasy 39-40 S jetip, qatty qaltyraıdy, jótel, álsizdik bastalyp, muryn biteledi. Qatty bas aýryp, bulshyq etter men býyndardyń syrqyraýy bilinedi.
