Qostanaılyqtar tanymal polıak pıanısine dombyra syılady
QOSTANAI. QazAqparat - Qostanaıda polıak pıanısi ári kompozıtor Kshyshtof Kıchor óner kórsetti, dep habarlaıdy QazAqparat.
Kontserttik baǵdarlamasymen Qostanaıǵa kelgen polıak pıanısi Kshyshtof Kıchordiń esimi ónersúıer qaýymǵa jaqsy tanys. Ol Frıderık Shopen, Ignatsııa Felıks Dobjınskıı, Aleksandr Zataevıch, ıAn Sıbelıýs syndy uly kompozıtorlardyń shyǵarmalaryn oryndap, álem sahnalarynda tanylyp úlgergen.
Kshyshtof Kıchor qaladaǵy №1 mýzyka mektebine kelip, óner kórsetti. «Z Polski z miłością» (Polshadan ystyq mahabbatpen) dep atalatyn kontsert keshin oblystyq Dostyq úıi men «Nadeıa» mýzyka mektebiniń polıak qaýymdastyǵy uıymdastyrdy. Ol osy kontsertin Polsha táýelsizdiginiń 100 jyldyǵyna arnady.
Oblystyq QHA basshysy Bıbigúl Aqqojına ónerpazǵa qostanaılyqtardyń atynan qazaqtyń halyq aspaby - dombyrany syıǵa tartty.
Bul basqosýǵa «Tobyl» fýtbol klýbynyń bas bapkeri Marek Zýb te shaqyrtyldy.
«Dostyq pen mahabbat mýzykamen ushtasty. Mýzykadan alynatyn sezim fýtboldaǵydan áste kem emes. Biz kólik jasap, kıim tikpeımiz, biz tek sezim usynamyz. Menińshe, osy emotsııa kontsertke kelgen árbir adamnyń júreginde saqtalady», - dep atap ótti Marek Zýb.
Aıta keteıik, Kshyshtof Kıchor osy kontserti arqyly Qazaqstandaǵy saıahatyn bastaıdy. Endi ol Atyraý, Qaraǵandy, Pavlodarǵa baryp, kontsert qoıady.
