Qostanaılyqtar Qazaq kóshesin aýystyrýdy suraıdy
QOSTANAI. QazAqparat - Qostanaı qalalyq ákimdiginde Qazaq jáne Avıatsıonnaıa kóshelerin aýystyrýǵa baılanysty qoǵamdyq tyńdaý ótti, dep habarlaıdy QazAqparat tilshisi.
Byltyrǵy jyly bastamashyl top Qostanaı qalasyndaǵy eki kósheniń atyn aýystyrý týraly qala ákimi Bazyl Jaqypovqa usynys hat joldaǵan-dy. Atap aıtqanda, Avıatsıonnaıa kóshesine Sotsıalıstik Eńbek Eri Kámshat Dónenbaeva esimin berip, Qazaq kóshesin Ábilsaı dep ataý usynyldy.
Búgingi qoǵamdyq tyńdaýda belgili aqyn Aqylbek Shaıahmet Kámshat Dónenbaevanyń elge sińgen eńbegin atap ótti. Birneshe pikirden soń, jıynǵa qatysqandar Avıatsıonnaıa kóshesine ataqty mehanızatordyń esimin berý kerektigin maquldady. Belgili bolǵandaı, keleshekte dál osy kóshege Kámshat Dónenbaeva atyndaǵy saıabaq salynady.
Budan soń máslıhat depýtattary Qazaq kóshesin aýystyrýdy talqylady. Qostanaıdyń qurmetti azamaty Begen Kópeshtiń aıtýynsha, bul kósheniń mańy erterekte Ábilsaı dep atalǵan, ýaqyt óte kele joldyń uzyndyǵy qysqaryp, Qazaq kóshesi bolyp atalyp ketken.
«Ózi kishkene ǵana aýmaqty alyp jatyr. Osy arada shamaly oılap kórińizdershi, óz jerimizde turyp, Qazaq dep kóshe ataǵanymyz uıat emes pe? Sol sebepti de, bul ýaqyt kúttirmeıtin sharýa. Ábilsaı ataýyn qaıtarý qajet», - dedi ol.
Qoǵamdyq tyńdaýdy qorytyndylaǵan qalalyq máslıhat depýtattary endi bul usynys oblystyq jáne respýblıkalyq deńgeıde qaralatynyn jetkizdi.
