Qostanaılyqtar «Qaıyrymdylyq kerýenin» bastady
Jastar jyly jáne Elbasynyń bıylǵy Joldaýymen úndesken joba «Meıirimdilikpen birlikke!» biryńǵaı uranymen ótkiziledi. Joba aıasynda jyldyń ár aıynda qaıyrymdylyq sharalar atqarylatyn bolady. Uıymdastyrýshylardyń aıtýynsha, kúntizbede 2019 jyldyń ataýly kúnderi eskerilgen.
«Biz qaıyrymdylyq aktsııasy barysynda basqa ult ókilderine qazaq halqynyń salt-dástúrleri men ádet-ǵuryptaryn tanystyrǵymyz keledi. Máselen, osy qańtar aıy biz jasaǵan kúntizbede «Sarqyt» dep atalady. Bul dástúrdiń máni - tamaqqa uqypty qaraý. Áleýmettik máni - as-sýdy basqalarmen, jaǵdaıy tómen adamdarmen bólisý. Biz óńirdegi barlyq bilim berý uıymyn, eńbek ujymdaryn qaıyrymdylyq aktsııasyn ótkizýdiń osyndaı formatyna qosylýǵa shaqyramyz. Sonymen qatar, aqpanda «Sybaǵa», naýryzda «Shashý» jobalaryn usynamyz. Sáýir aıynyń basynda jerlesterimizdi uzaq qystan keıin asarlatyp qoldaýǵa tıispiz. Bul aıdy «Asar» dep ataýymyzdyń sebebi sol. Aǵa urpaqqa qamqorlyq jasaý aıy - mamyr. Mektepter, joǵary oqý oryndarynyń túlekterine qoldaý kórsetýdi «Toqymqaǵar» aıynda, ıaǵnı, maýsymda ótkizemiz. Osylaısha, jyl boıy halyqtyń ártúrli toptaryn qamtyp, aktsııa uıymdastyrý josparlanǵan», - dep atap ótti QHA múshesi Erkin Ábil.
QHA janyndaǵy Analar keńesiniń tóraıymy Shýshanık Sarkısıan erikti sharaǵa jastardy tartý kerektigine basa nazar aýdardy.
«Osy kúntizbede kórsetilgen ıgilikti isterge jas býyndy barynsha jumyldyrý úshin «Zhas Project» ispetti jobalardy jandandyrýdyń mańyzy zor. Bálkim, olardyń kásip ashýlaryna memlekettik tegin grant bólinse deımiz. Úkimettiń qoldaýyn sezingen jastar muqtaj jandarǵa tegin qyzmet kórseter edi» - degen oıyn bildirdi Sh.Sarkısıan.
Aıta keterlik jaıt, Qazaqstan halqy Assambleıasy 2015 jyldan bastap «Qaıyrymdylyq kerýeni» respýblıkalyq aktsııasyn ótkizedi. 2018 jyly elimizde 8733 is-shara ótti, jalpy somasy 2,5 mlrd teńgeden astam qarjyǵa 400 myńnan astam adam kómek aldy.
