Qostanaılyqtar qala mańyn qoqys alańyna aınaldyrǵan
QOSTANAI. QazAqparat - Lısakov qalasynyń turǵyndary qala mańyndaǵy ruqsat etilmegen jerdi qoqys alańyna aınaldyrǵan. Bul týraly ákimdikte ótken keńeıtilgen jıynda Qostanaı oblysy ákiminiń birinshi orynbasary Ǵaýez Nurmuhambetov aıtty, dep habarlaıdy QazAqparat tilshisi.
Ǵaýez Nurmuhambetovtiń aıtýynsha, aǵymdaǵy jyly sanıtarııalyq tazartý, abattandyrý jáne kógaldandyrý jónindegi jumystar eki aı - 12 sáýir men 14 maýsym aralyǵynda ótedi. Energetıka jáne turǵyn úı-kommýnaldyq sharýashylyq basqarmasy apta saıyn eldi mekenderdi abattandyrý boıynsha atqarylǵan jumystarǵa monıtorıng júrgizedi.
«Byltyrǵy tazalyq aılyǵy kezinde oblys boıynsha 660 qoqys alańy tazartyldy. Onyń ornyna 30 myń aǵash egilip, 406 saıabaq ashyldy. Kommýnaldyq bólim mamandary polıgondarǵa 75 myń tonnadaı qoqys shyǵardy. Qazirgi ýaqytta ruqsat etilmegen jerlerdi qoqys tastaıtyn orynǵa aınaldyrǵandarmen kúresti qolǵa alý qajet. Máselen, Lısakov qalasynyń shetindegi ruqsat etilmegen jer qoqys alańyna aınalǵan. Adamdar munda qurylys materıaldarynyń qaldyqtaryn da tastaǵan», -dedi oblys ákiminiń orynbasary.
Sondaı-aq, Ǵ.Nurmuhambetov ruqsat etilmegen jerlerge qoqys tastaıtyndarmen kúresý úshin beınebaqylaý kameralaryn ornatýdy usyndy. Buǵan qosa, tártip buzýshylarǵa iri kólemde aıyppul salý qajet.
«Bul máselemen qalalar men aýdandardyń ákimderi tikeleı aınalysýlary tıis. Mysaly, 2014 jyly Lısakov ákimdigi ruqsat etilmegen qoqys tastaıtyn jerlerdi joıý jáne boldyrmaý úshin 2 beınebaqylaý kamerasyn ornatty. Bul jumys jemisin berdi. 51 quqyqbuzý faktisi anyqtalyp, turǵyndarǵa 274 myń teńge aıyppul salyndy. Nátıjesinde, qalalyqtar kúl-qoqysty polıgonǵa tastaıtyn boldy», -dedi Ǵ.Nurmuhambetov.
Bıyl Qostanaıda sanıtarlyq jumystardy júrgizý, kógaldandyrý jáne avtokólik joldaryn abattandyrý boıynsha bıýdjetten 10,5 mlrd teńge bólindi.
