Qostanaılyqtar qala kúnin toılap jatyr
QOSTANAI. QazAqparat - Qostanaıda qala kúni atalyp ótildi, dep habarlaıdy QazAqparat.
Kesheli beri qostanaılyqtar qalanyń 139-shy týǵan kúnin erekshe yqylaspen atap ótýde. Túrli sporttyq- mádenı sharalar uıymdastyrylyp, kontserttik baǵdarlamalarmen jalǵasyp jatyr.
Aıta keteıik, keshe qala turǵyndaryn estrada ánshisi Serik Ibragımov quttyqtap, án keshin berdi. Osy kúni «QR Táýelsizdigine 25 jyl» saıabaǵynda motofrıstaıl sherýi bastaldy. Kún aıaǵynda «Sıqyrly bı álemi» festıvali men lazer shoýy ótkizildi. Buǵan qosa «Kostanaıskıe zorı», «Iskorka», «Zorıanka», «Indıgo» syndy horeografııalyq ujymdar óz ónerlerin pash etti.
Al búgin qalalyqtar A.Baıtursynuly atyndaǵy alańǵa jıyldy. Munda - mektep oqýshylarynyń labırınt oıyny. Bul ýaqytta ortalyqtaǵy mádenı demalys saıabaǵynda da is-sharalar qatar ótti. Án men jyr baıqaýynyń úzdikteri anyqtaldy.
Bıznes ortalyǵynyń mańyna jınalǵan jurttyń qarasy qalyń. Sebebi, bul jerde hot-dog ázirleýden oblys chempıonaty ótti. Basty talap - 6 mınýt ishinde 30 hot-dog jasaý. Úzdik shyqqandarǵa turmystyq tehnıkalar tapsyryldy.
«Hot-dog jasaýdyń qıyn emestigin árkim biledi. Biraq, ony dámdi ári sapaly jasaý qıyn is. Men eki jyl boıy atalmysh fast-fýdty daıyndap kelemin. Búgingi chempıonatqa 50-ge jýyq qatysýshy tirkeldi. Solardyń ishinen ozyq shyqqany baǵaly syılyqqa ıe bolady. Qostanaılyqtardy qala kúnimen quttyqtaımyn», - deıdi jarys qatysýshysy Mádına Janbosynova.
Qala kúniniń keshki baǵdarlamasy ortalyqtaǵy shahmat klýby mańyndaǵy sahnada jalǵasady.
Sondaı-aq, oblystyq orys qoǵamdastyǵy «Almaly tamyz» merekelik baıqaýyn ótkizedi. «Týǵan kúnińmen, Qostanaı!» merekelik baǵdarlamasynan soń otshashý uıymdastyrylady.
