Qostanaılyqtar dárigerlerdi mobıldik qosymsha arqyly shaqyrta alady
QOSTANAI. QazAqparat - Qostanaı emhanalarynda elektrondyq ambýlatorııalyq kartalar jasalyp jatyr. Bul týraly óńirlik kommýnıkatsııalar qyzmetinde ótken brıfıngte oblystyq densaýlyq saqtaý basqarmasy basshysynyń orynbasary Abat Jaýkov málimdedi, dep habarlaıdy QazAqparat.
Oblystyq densaýlyq saqtaý basqarmasy emhanalarda keshendi medıtsınalyq aqparattyq júıe engizdi. Nátıjesinde, qaǵazbastylyqtan arylyp, emhanalardaǵy kezek azaıyp, ýchaskelik dárigerlerge júginý qajettigi tómendedi.
«Qazirgi tańda jańa júıeni halyqqa túsindirý úshin josparlar ázirlenip, densaýlyq saqtaý salasynyń elektrondyq qyzmetteriniń múmkindikteri nasıhattalýda. Keshendi medıtsınalyq aqparattyq júıe óńirdegi 41 mekemege engizildi. Bul maqsatqa oblystyq bıýdjetten 361,3 mln. teńge bólingen. Al, bıyl bul júıeni tórt mekemege: narkologııalyq, psıhıatrııalyq, oblystyq SPID-ke qarsy kúres ortalyǵy, oblystyq balalar stomatologııasyna engizý josparlanyp otyr», - dedi Jaýkov óz baıandamasynda.
Búginde oblystaǵy barlyq emdeý mekemeleriniń 90,9 paıyzy kompıýtermen jaraqtalǵan. Ótken jyly medıtsınalyq uıymdar 429 kompıýterlik tehnologııalarmen qamtylsa, bıyl bul maqsatqa 387,9 mln teńge bólinip otyr.
Tsıfrlandyrý júıesiniń arqasynda patsıentter úıden shyqpaı-aq retseptti, dáriger keńesin, anyqtamany, dárigerdiń qabyldaýynan keıingi qorytyndyny ala alady.
Jalpy, jańa júıe elimiz boıynsha tórt oblysta - Qaraǵandy, Qostanaı, Aqmola jáne Batys Qazaqstan oblystarynda, sondaı-aq respýblıkalyq deńgeıdegi birqatar uıymdarda pılottyq joba retinde júrgizilip jatyr. Al, 2019 jyldyń 1 qańtarynan bastap medıtsına uıymdary medıtsınalyq qujattamany qaǵazsyz formatta júrgizýge tolyqtaı kóshetin bolady.
«Búginde tsıfrlandyrý aıasynda qaǵazsyz aınalymǵa kóshý júrgizilip jatyr. Keler jyldan bastap elektrondyq ambýlatorııalyq kartalar, aýrýlardyń elektrondyq tarıhy jáne elektrondyq retseptilerdiń kóshirmesi sııaqty qujattardy qaǵazsyz formatta júrgizýge tolyqtaı kóshetin bolamyz. Sondaı-aq, turǵyndardyń mobıldik qosymsha arqyly dárigerdi shaqyrtyp, qabyldaýyna jazylýǵa múmkindikteri bar», - deıdi Abat Jaýkov.
