Qostanaılyqtar bıyl 5 mln tonna astyq jınamaq
QOSTANAI. QazAqparat - Qostanaı oblysynyń dıqandary kúzgi jıyn-terim jumystaryna ázir. Bul týraly oblys ákimdiginde aýyl sharýashylyq taýar óndirýshilerimen ótken jıynda málim boldy, dep habarlaıdy QazAqparat.
Jıynda aldaǵy egin oraǵyna ázirlik barysy týraly oblys ákiminiń birinshi orynbasary Ǵaýez Nurmuhambetov baıandama jasady. Onyń aıtýynsha, bıylǵy astyqtyń shyǵymy jaman emes. Ortasha eseppen alǵanda gektaryna 12-13 tsentnerden aınalýy yqtımal.
Óńir dıqandary egis alqaptary qurylymyn ártaraptandyrýǵa, mal sharýashylyǵyn qarqyndy damytýǵa, ishki jáne syrtqy naryqta talap etiletin sapaly aýyl sharýashylyq ónimderin shyǵarýǵa asa mán berip otyr. Máselen, bıyl shamamen 4 mln 60 myń gektar alqapqa dán sińirilse, sonyń 430 myń gektary túrli maıly daqyldardyń, 3,8 myń tonna kartop óniminiń enshisine tıdi.
«Endi jerde óngen dánniń bir túıirin shashaý shyǵarmaı, jınap-terip alý basty mindet sanalady. Sondyqtan, jaz boıy oblys aýylsharýashylyq taýar óndirýshileri múmkindikti múlt jibermeýge tyrysty. Tsıfrlandyrý aıasynda mashına-traktor alańy jańartylyp, zııankestermen kúreste tyń júıeler qoldanyldy. Barlyǵy 76 myń tonna dızeldik otyn satyp alyndy. Onyń lıtri 172 teńgeden satylady. Endi tamyz aıynyń jıyrmasyna qaraı dıqandar eginge jappaı oraq salady. Jalpy, bıyl 5 mln tonna astyq alýǵa nıettimiz», - dedi Ǵ.Nurmuhambetov.
Naýqandyq jumystarǵa qajetti dızeldik otyn jetkilikti. Tehnıka saqadaı saı. Egin oraǵyna barlyǵy jıyrma myńnan astam traktor men myńǵa jýyq egistik keshenderi jumyldyrylady.
Oblys ákimi Arhımed Muhambetov dala jumystary kezinde astyq, janar-jaǵarmaı urlyǵyna jol bermeýdi qatań tapsyrdy. Sebebi, mundaı olqylyqtar budan burynǵy egis ýaqytynda tirkelgen. Biraq, astyq urlaǵandardyń kóbi jazasyz qaldy. Endi buǵan aýdan basshylary men quqyq qorǵaý organdarynyń jetekshileri tikeleı jaýapty bolmaq.
