Qostanaılyqtar Baıtursynulynyń eskertkishindegi taqtaıshadan qate tapty

QOSTANAI. QazAqparat - Qostanaı qalasyndaǵy kórnekti oryndarǵa ornatyla bastaǵan QR kodtardaǵy qatelikter qala turǵyndarynyń narazylyǵyn týdyrdy, dep habarlaıdy QazAqparat tilshisi «Qostanaı tańy» gazetine silteme jasap.

QR-kod beınelengen taqtaıshadaǵy memlekettik tildegi mátin qate jazylypty. Sony bile tura únsiz qalýdy ar sanadyq. Qazaq álipbıiniń atasy Ahmet Baıtursynulynyń eskertkishine qate jazý ilinbese kerek» -dep jazady oblystyq gazet.

Taqtaıshada kezdesken qatelikter áleýmettik jelilerde jan-jaqty talqylanyp jatyr.

«Kúni keshe ornatylǵan elektrondyq aqpar beretin taqtadaǵy memlekettik tildegi jazýlarǵa qarap shoshydyq. Osyny ornatyp jatqanda bir saýatty adam tabylmady ma?», «Qatelerdi qaladaǵy memlekettik mekemelerdiń ataýlary jazylǵan mańdaıshasynan da kórýge bolady. Qostanaı qalalyq tótenshe jaǵdaılar basqarmasynda «tótenshe jaǵdaılar» degen sóz «Jaǵdaılar» dep biraz ýaqyt turyp, synǵa ilikkende baryp durystaǵan bolatyn», - dep jazady turǵyndar.

Mamandardyń aıtýynsha oblys ortalyǵyndaǵy jarnama agenttikterinde saýatty aýdarmashylar joqtyń qasy. Sondyqtan, qateler ár qadam saıyn kezdesedi.

«Onyń ústine osy agenttikterde aýdarmashy qyzmetimen dızaınerler aınalysady. Olar bolsa memlekettik tildi múldem bilmeıdi. Osydan baryp, qazaq tilindegi jazýlarda qate kóp ketedi», - deıdi Qostanaı oblystyq tilderdi damytý basqarmasynyń bólim basshysy Jarasqan Naýryzbaev.

Eskertkishterde ornatylǵan QR kodtardaǵy qatelikter týraly ákimdik ókili jaýap berdi.

«Bul joba bıylǵy maýsym aıynda oblystyq ishki saıasat basqarmasy uıymdastyrǵan áleýmettik ıdeıalarmen jobalardyń jármeńkesinde jeńiske jetken. Sondyqtan taqtaıshadaǵy aqpar beretin jazýlarǵa tikeleı biz jaýaptymyz. Jýyq arada QR kodtardaǵy memlekettik tildegi jazýlardy durystap, qaıta ilemiz», - dedi Qostanaı oblysy ákimdiginiń ishki saıasat basqarmasynyń bas mamany Abylaıhan Kákenov.