Qostanaılyqtar avtobýs kestesin telefonnan baqylaı alady
QOSTANAI. QazAqparat - Qostanaıda qoǵamdyq kólikterdiń kestesin baqylaýǵa múmkindik beretin mobıldik qosymsha iske qosyldy, dep habarlaıdy QazAqparat tilshisi.
Jańa jobanyń avtory Muhtar Іlııasov qosymshany qoldaný júıesi týraly aıtyp berdi.
«Negizinen, biz iske qosqan qosymsha Rıazan qalasynyń mamandary jasaǵan baǵdarlamaǵa uqsaıdy. Bul júıe avtobýstarǵa GPS-treker ornatqan soń qosylady. Munan soń qoǵamdyq kólikterdiń baǵyty serverge túsedi. «Aqyldy kólik» qosymshasy múmkindigi shekteýli jandar úshin de qolaıly jaǵdaılardy qarastyrǵan. Saıtta (Smartbus.kz) múgedekterdiń túsip-minýine yńǵaıly avtobýstar aq túspen belgilenip turady. Bul qyzmet Android jáne IOS platformalarynda jaqyn arada paıda bolmaq»,- deıdi M. Іlııasov.
Qosymshany braýzer arqyly Smartbus.kz saıtynda, sondaı-aq Android jáne IOS baǵdarlamalyq júıeleri arqyly uıaly telefonda paıdalanýǵa bolady.
«Qosymshanyń taǵy bir artyqshylyǵy bar. Kez kelgen tutynýshy A núktesinen V núktesine mekenjaıdy kórsetedi. Budan soń baǵdarlama avtobýstardyń kestesin shyǵarady. Osylaısha, árkim ózderine qajetti qoǵamdyq kólikterdi tańdaıdy», - dep túsindirdi qosymsha avtory.
Aıta keteıik, «Aqyldy kólik» júıesi Qostanaıdaǵy 10 avtobýsqa engizildi. 15 naýryzǵa deıin barlyq qoǵamdyq kólik jańa júıege qosylady.
