Qostanaılyqtar Astanaǵa arzan baǵamen 650 tonna ónim ákeldi
ASTANA. QazAqparat - 5-6 tamyzda Astanadaǵy Qostanaı kúnderi aıasynda «Qazaqstan» sport kesheni alańynda Qostanaı oblysynyń aýyl sharýashylyǵy óndirýshileri, kásiporyndary jáne jeke kásipkerleriniń qatysýymen «EKSPO-2017» kórmesine arnalǵan aýyl sharýashylyǵy jármeńkesi ótedi.
Qostanaılyqtar bazardaǵydan tómen baǵamen ónim usynady, dep habarlady ortcom.kz. Jármeńkege Qostanaı oblysynyń 14 aýdany men qalasynan aýyl sharýashylyǵy taýarlaryn óndirýshiler qatysady. Sórelerge 100 túrli shujyq, sút, kondıterlik, un, makaron ónmderi qoıylady. Barlyǵy 650 tonnaǵa jýyq ónim satylady.
«Jármeńke eki kún tańǵy saǵat 10-nan keshki 4-ke deıin jumys isteıdi. Satyp alýshylarǵa 55 tonna kartop, kókónister usynylady. Etten (sıyr eti, jylqy eti, qoı eti, taýyq eti) basqa táttiler, tabıǵı bal satylady», - dedi Ortalyq kommýnıkatsııalar qyzmetinde aýyl sharýashylyǵy basqarmasynyń basshysy Baıbosyn Mýrzın.
