Qostanaılyqtar 2 aıda 23 mln teńgege kólik nómirlerin satyp alǵan
QOSTANAI. QazAqparat - Jyl basynan beri qostanaılyqtar avtokólik nómirlerin satyp alý úshin 23 mln teńge jumsady, dep habarlaıdy QazAqparat.
Oblystyq ІІD tirkeý-emtıhan jumystary bóliminiń basshysynyń orynbasary Aslan Balǵabaevtyń aıtýynsha, qostanaılyq kólik júrgizýshilerdiń arasynda 010 nómiri belgisi erekshe tanymal. Mundaı 31 dana nómir satylǵan. Odan keıin 077 nómiri 13 kólik ıesine ótken.
"Kóp suranysqa ıe bolǵan 010, 020, 030, 040, 050, 060, 070, 077, 080, 090, 707 nómirleriniń baǵasy 57 AEK qurady. Al 100, 111, 200, 222, 300, 333, 400, 444, 500, 555, 600, 666, 700, 800, 888, 900, 999 memlekettik tirkeý belgileri 137 AEK-ke baǵalandy. Jalpy, eki aı ishinde qostanaılyqtar bıýdjetke 23 mln teńge aýdarǵan",-dedi ol.
Sonymen qatar, qarapaıym memlekettik tirkeý nómiriniń qasynda tek ádemi áripterdiń tizilgenin qup kórseńiz, onda 137 085 teńge tóleýge týra keledi.Balǵabaev aıtqandaı, kóligine qymbat nómir taqqysy keletinderdiń kóbisi er azamattar eken.
