Qostanaılyq jumystan zańsyz shyǵarylǵanyn sotta dáleldedi
QOSTANAI. QazAqparat - Arqalyq qalasynyń turǵyny ózin zańsyz jumystan shyǵarǵanyn sotta dáleldedi, dep habarlaıdy QazAqparat tilshisi.
«Arqalyq jylý energetıkalyq kompanııasy» memlekettik mekemesiniń qyzmetkeri jumysqa qaıta alý men jalaqysyn óndirý týraly aryzymen sotqa júginedi. Ol atalǵan uıymda 16 jyl jumys istegen. Áıel sotta kámelettik jasqa tolmaǵan eki balasymen bir bólmeli páterde turyp, olardy jalǵyz tárbıelep jatqanyn aıtty. Balalarynyń biri múgedek.
Ol ústimizdegi jyldyń 20 qańtarynan bastap 25 aqpanǵa deıin kezekti eńbek demalysynda bolǵan. Jumysqa shyqqan soń, oǵan kelesi kúni tehnıka qaýipsizdigi boıynsha emtıhan tapsyrý kerektigin aıtqan. Ol balalary aýyryp qalǵandyqtan synaqqa qatysa almady. Emtıhandy 16 naýryzda qaıta tapsyrýǵa tıis boldy. Alaıda, sol sátte basshylyq jumys kestesin basqasha aýystyryp qoıǵan. Áıel jańa keste boıynsha taǵy da jumysqa shyǵa almaǵan. Keıin oǵan pochta arqyly jumystan shyǵarý týraly buıryq kelgen.
Basshylyqtyń sheshimine kelispeı, azamatsha bastapqyda óz quqyǵyn qorǵaý úshin kásipodaq komıtetine, sodan soń sotqa júgingen.
Arqalyq qalalyq soty barlyq mán-jaıdy eskere, azamatsha J.-ny jumystan shyǵarýǵan uıymnyń sheshimin negizsiz dep tapty. Birinshiden, ol emtıhannyń bolatyny týraly aldyn ala eskertý almaǵan. Ekinshiden jumys berýshi jumysshynyń kelisiminsiz jumys kestesin ózgertken jáne habarlama jasamaı jumystan shyǵarǵan.
Sot eńbek shartynyń buzylǵanyn eskerip, azamatshanyń jumystan bosatylýyn zańsyz dep tapty. Sot sheshimimen ol burynǵy qyzmetine qaıta alyndy.
Sondaı-aq, onyń paıdasyna kásiporynnan májbúrli bos júrgen ýaqyty úshin 397 myń teńge somasynda 4 aıǵa jalaqy óndirildi.
Sot sheshimi zańdy kúshine engen joq.
