Qostanaılyq jer astynda kókónis pen jemis-jıdek ósirýdi qolǵa aldy
QOSTANAI. QazAqparat - Qostanaı oblysy, Qostanaı aýdanynyń turǵyny Jolbolsyn Ábishev termos-jylyjaıda kókónis ósirýdi qolǵa aldy, aldaǵy ýaqytta tsıtrýstyq jemisterdi de ósirmek, dep habarlaıdy QazAqparat tilshisi.
Jańa tehnologııamen jemis-kókónis ósirý ıdeıasyn Jolbolsyn Ábishev Germanııadan sonaý 1989 jyly ákelgen. Jobanyń qolaılylyǵy kóńil aýdartady: júıe jylyjaı kún energııasyn barynsha paıdalanyp, jylý energııasyna aınaldyratyndaı etip jasalǵan. Byltyr Qostanaı mańyndaǵy Zarechnyı kentine kóship kelgen soń, burynnan oıda júrgen ıdeıasyn iske asyrýǵa múmkindik týdy.
J. Ábishevtiń aıtýynsha, oranjereıada kúndiz 34 gradýs bolady. Mundaı jaǵdaıda tsıtrýs ósimdikterin ósirýge de bolady, biraq bul áli tek jospar kúıinde qalyp otyr. Qazir qııar, qyzanaq sekildi qyr-syry burynnan belgili kókónisterge kúsh salyp jatyr. Jolbolsynnyń joly bolyp, óńirlik kásipkerler palatasy «Bastaý-bıznes» jobasynyń aıasynda jylyjaı salýǵa qajetti 3 mıllıon teńge mólsherinde grant bólipti.
«Jańa qonysta nemen aınalysamyn dep otyrǵanda, eń aldymen osy ıdeıa oıyma oraldy. Qazir qyryq altydamyn, búkil ómirimdi mal sharýashylyǵyna arnap keldim. Bul - men úshin jańalyq. Qazaqstanda termos-jylyjaı ataýly endi ǵana qolǵa alynyp jatyr», - deıdi ol.
Aıta keterligi, jańa tıptegi jylyjaıdy salý úshin jerdi 2 metr qazyp, ústin, qabyrǵalaryn jylý ótkizbeıtin materıaldarmen oraǵan. Aýdany 150 sharshy metr keletin tranjereıa áli tolyq qýatpen jumys istep turǵan joq, bári oıdaǵydaı bolsa, onyń alǵashqy jemisi sáýir aıynyń aıaǵyna qaraı tutynýshyǵa jol tartady.
