Qostanaılyq jastar Aıagózge kómek jetkizetin demeýshi izdep jatyr
QOSTANAI. QazAqparat - Oblystyq jastar resýrstyq ortalyǵy Aıagóz aýdanynda sý tasqynynan zardap shekkenderge kómektesý úshin qor qurdy, dep habarlaıdy QazAqparat tilshisi.
Shyǵys Qazaqstan oblysynda bolǵan tabıǵat apatynan zardap shekken otandastarymyzǵa kómek kórsetý maqsatynda ár oblysta arnaıy shtabtar ashylyp, qor qurylyp jatqany belgili. Saýapty iske Qostanaı oblystyq jastar resýrsy ortalyǵy da qosyldy.
«Bizdiń ortalyq «Qaıyrymdylyq aılyǵy» sheńberinde Aıagózde sý tasqynynan qıyndyqqa ushyraǵandarǵa kómektesý úshin qaıyrymdylyq aktsııasyn uıymdastyrdy. Sharanyń maqsaty - muqtaj jandarǵa aqshalaı jáne gýmanıtarlyq kómek kórsetý», - deıdi jastar resýrstyq ortalyǵynyń jetekshisi Aıgúl Abdýlına.
Aıta keteıik, ortalyq qory Qostanaı memlekettik pedagogıkalyq ınstıtýty bazasynda quryldy.
«Apta basynan beri qıyndyqqa tap bolǵandarǵa kıim-keshek, azyq-túlik qabyldanyp jatyr. Qazirdiń ózinde 100 kelige jýyq kıim jınaldy. Sonymen birge, logıstıka máselesi de týyndap otyr. Óz kóligimen Aıagózge zat jetkizetin demeýshiler izdestirilýde», - dedi ortalyq jetekshisi.
