Qostanaılyq jasóspirimder birneshe jyl boıy akkýmýlıator urlap kelgen
QOSTANAI. QazAqparat - Oblystyq tártip saqshylary akkýmýlıator batareıalarynyń urlyǵy derekterine qatysty Áýlıekól aýdanynyń eki turǵynyn ustady, dep habarlaıdy QazAqparat oblystyq ІІD baspasóz qyzmetine silteme jasap.
Polıtseıler 15 qańtar kúni keshke «Áýlıekól-Qostanaı» baǵytynda jeńil avtokólikti toqtatady. Kólik ishinde 17 jasar jasóspirimder bolǵan. Tekserý barysynda kólikten eki qymbat akkýmýlıator tabyldy.
«Kúdiktilerdiń Amanqaraǵaı aýylynda turatyny anyqtaldy. Olar sol kúni «Kamaz» júk kólikteriniń akkýmýlıatorlaryn qoldy qylǵan. Osylaısha, jábirlenýshilerge 80 myń teńgege jýyq shyǵyn keltirgen», - delingen oblystyq ІІD baspasóz qyzmeti taratqan habarlamada.
Belgili bolǵandaı, kúdiktiler osy «kásibi» arqyly birneshe jyl boıy paıda tapqan. Máselen, byltyr aýyldasynyń eki qymbat akkýmýlıatoryn alyp ketken. Sondaı-aq, ústimizdegi jyldyń 3 qańtarynda aýlada turǵan «Kamaz» kóliginiń 120 myń teńgelik akkýmýlıatoryn urlaǵan.
Jasóspirimder urlanǵan múlikterdi túrli jerlerge ótkizip, aqshasyn óz qajettilikterine jumsaǵan. Atalǵan jaıt boıynsha, QR Qylmystyq kodeksiniń 188-baby («Urlyq») boıynsha qylmystyq is qozǵaldy.
Sotqa deıingi tergeý amaldary júrgizilýde.
