Qostanaılyq jas kásipker Street workout alańyn ashty
Jastardyń ıdeıasy tyń, jospary tıimdi bolǵanymen, ony iske asyrýǵa qarjylyq jaǵdaılar kese-kóldeneń turady. Degenmen, memlekettiń qoldaýy arqasynda bul olqylyqtyń orny toldy. Dálirek aıtqanda, «Zhas Project» jobasy ıdeıasy mol jastarǵa qarjylaı demeýshilik jasap, jeńimpazdarǵa 1 mln teńge kóleminde qaıtarymsyz grant negizinde qarjy berdi. Osyndaı ıgi bastamalardyń biri - Meńdiqaradaǵy Street workout alańy. Jattyǵý alańy beltemirlermen, qyrly bórenelermen, shyǵyrshyqtarmen, shved qabyrǵalarymen, basqa da qajetti nysandarmen jabdyqtalady. Atalǵan jobany Batyrhan Ismaılov, Anastasııa Olenberg, Araılym Jıenqulova syndy jastar qolǵa alǵan.
«Bizdiń jobamyz Qostanaı oblysynda jańalyq retinde qabyldandy. Sebebi Street workout alańdary Qazaqstanda endi ǵana damyp keledi. Mundaǵy maqsat - salamatty ómir saltyn nasıhattaý, jastar arasynda buqaralyq sportty damytý. Rasymen de qazirgi kezde adamdar dene shynyqtyrýdy eskere bermeıdi. Ol durys emes. Bajaılap qarasaq, qozǵalyssyz jumys isteıtin adamdar túrli aýrý-syrqattarǵa shaldyǵady. Muny medıtsına áldeqashan dáleldegen. Sol sebepti, adamdarǵa deneni nyǵaıtýǵa arnaıy ýaqyt bólýdiń qajettiligin túsindirgimiz keledi», - deıdi Batyrhan Ismaılov.
Salamatty turmysty qoldaıtyn jastar osy ıdeıany alǵa tartyp, «Zhas project» jobasyna qatysady. Byltyrǵy tamyz aıynda olardyń usynystary memleket tarapynan qoldaý tapqan bolatyn.
«Osy «Zhas project» jobasynyń negizgi maqsaty da osal toptaǵy jastardyń bastamalaryna qarjylaı qoldaý kórsetý jáne sol arqyly shaǵyn jáne orta bıznesti damytý ǵoı. Munda eń mańyzdysy - ıdeıa jáne jospar. Jeńimpaz atanyp, qolǵa 982 myń teńgeni alǵan soń, birden iske kiristik. Street workout alańdaryna qajetti qural-jabdyqtardy Qostanaıdan satyp aldyq. Bizge «Sosnovyı bor» shıpajaıy arnaıy oryn bóldi», - deıdi sport mamany
Negizi Batyrhan sporttyń osy túrimen 2014 jyldan bastap aınalysady. Onyń paıdasyn kórip, Borovskoe aýylynan úıirme sabaǵyn ashty.
«Street workout - fıtnestiń eń demokratııalyq túrleriniń biri. Ol qymbat snarıadtar satyp alý nemese sport zaldaryna jazylý joldamasyn satyp alýdy qajet etpeıdi.Barlyǵyna qoljetimdi. Biz munda sheberlik dáristerin ótkizip, durys tamaqtaný jóninde keńester beremiz. Adamdardyń deni semizdikke qalaı urynǵanyn baıqamaı qalady ǵoı. Street workout osy máselemen kúresýdiń birden bir joly. Akrobatıka men túrli qımyl-qozǵalys jattyǵýlary satylaı júrgiziledi. Alańǵa jańadan kelgen adam jeńil jattyǵýlardan bastalady», - dep túsindirdi Batyrhan Ismaılov.
Memleket basshysynyń ár jylǵy Joldaýlarynda jastardy qoldaýǵa baǵyttalǵan jobalarǵa basymdyq berilip keledi. Jeke kásibin ashýǵa nıetti jandar úshin kóptegen múmkindikter qarastyrylǵany qýantady. Batyrhan Ismaılov aıtqandaı, endi jastarǵa tek izdenis pen iskerlik kerek.
