Qostanaılyq zaýyt sút ónimderiniń 70 túrin shyǵarady
QOSTANAI. QazAqparat - QR Parlamenti Májilisiniń depýtattary oblys ortalyǵyndaǵy óndiris oryndaryn aralady, dep habarlaıdy QazAqparat.
Depýtattar qaladaǵy «Mılh» sút shyǵarý zaýytynda boldy. Olar munda agrarlyq salaǵa qatysty zań normalarynyń jergilikti jerde qalaı júzege asyp jatqanymen tanysty. «Mılh» JShS sút ónimderiniń 70-ke jýyq túrin shyǵarady. Munda búginde 600-ge jýyq adam eńbek etedi. Óndiris barysy sońǵy úlgidegi «aqyldy» mashınamen basqarylady. Kásiporyn bes jyl boıy taýaryn Reseıge eksporttap keledi. Byltyr syrtqy naryqqa jiberilgen ónimniń úlesi 12 protsentke artqan. Zaýyt shıkizatty jergilikti óndirýshilerden satyp alady. Bul sút óndiretin sharýashylyqtar men aýyl turǵyndary úshin asa tıimdi.
«Jyl saıyn aýylsharýashylyǵy salasyna 600 mlrd teńge bólinedi. Sonyń teń jartysy - sýbsıdııa. Bul degenińiz, qaıtarymsyz qarjy. Memleket tarapynan kásip bastaýshylarǵa úlken kómek kórsetilip jatqanyn baıqaýǵa bolady. Munyń bári bıznesti, sonyń ishinde aýyldyq jerdegi óndiristi damytý úshin jasalyp jatqan jumys»,- deıdi QR Parlamenti Májilisiniń depýtaty Murat Temirjanov.
Halyq qalaýlylary aýmaqtyq kásipodaq aıasynda jumys isteıtin jastardyń keńeıtilgen otyrysyna qatysty. Jas kásipker Aıgúl Mustafınanyń sózinshe, qazirgi ýaqytta jastardyń bastamalaryna zamanaýı úlgide qoldaý kórsetiledi.
«Men byltyr «Jas proekt» jobasyna qatysyp, «Kishkentaı» atty áleýmettik tiginhana ashtym. Bastapqyda úsh baǵytta jumys istedik. Sonyń biri - erekshe kútimdi talap etetin balǵyndarǵa saýyqtyrý ónimderin shyǵara bastadyq. Shala týǵan nárestelerge arnaıy toqylǵan kıimderdi tigý de josparǵa endi. Bul bastamaǵa Elbasy Nursultan Nazarbaevtyń ózi erekshe lebizin bildirdi»,- deıdi jas kásipker.
Kezdesýde áleýmettik salalar boıynsha máseleler kóterildi. Osy ýaqytqa deıin oblysta 20 myńnan astam adam áleýmettik kómekke qol jetkizgen. Orta eseppen aımaqta aıyna bir balaǵa kómek mólsheri 4706 teńgeden bastap 20 789 teńgege deıin jetedi. Bul ótken jylǵydan 4,4 esege deıin ulǵaıdy.
Oblysta «Qutty meken» jobasy aıasynda 2 mlrdtan astam qarjyǵa 46 jobany júzege asyrý kózdelýde. Halyq qalaýlylary áleýmettiń áleýetin áldendiretin bastamalar aldaǵy ýaqytta da jalǵasatynyn jetkizdi.
